इटहरीः स्थानीय तह निर्वाचनमा सुनसरीको इटहरी उपमहानगरपालिकामा चुनावी दौडमा उत्रिएको नेपाली कांग्रेस नेतृत्वको चुनावी गठबन्धनले २५ बुँदे संकल्पपत्र सार्वजनिक गरेको छ ।

इटहरी ५ स्थित लायन्स भवनमा आयोजित समारोहका बीच गठबन्धनले सार्वजनिक गरेको संकल्पपत्र मुलतः सुशासन र पारदर्शितामा केन्द्रीत रहेको नेपाली कांग्रेस इटहरीका सचिव मन्दीप भट्टराईले जानकारी दिए । उनका अनुसार पूर्वाधार विकास, शिक्षा, स्वास्थ्य, रोजगारी, डुबानको समस्या समाधान, शहरको सौन्दर्य प्रवद्र्धन, कृषि आधुनिकीकरण, साहित्य र संस्कृतिको संरक्षण तथा फोहोर व्यवस्थापनको मुद्दा पनि संकल्पपत्रमा समेटिएको छ ।

नगरका बासिन्दालाई स्वच्छ खानेपानी उपलब्ध गराउनुका साथै स्मार्ट पार्किङको व्यवस्था मिलाउने तथा एक हजार वर्ग फिटसम्मको घर नक्सा निःशुल्क पास गर्ने व्यवस्था गर्ने पनि संकल्पपत्रमा उल्लेख भएको भट्टराईले उल्लेख गरे । करको दायरा बढाउँदै दर घटाएर नागरिकलाई सहुलियत हुनेगरी प्रगतिशील राजश्व नीति अख्तियार गर्ने गठबन्धनको संकल्प रहेको छ । संयुक्त गठबन्धनका तर्फबाट उपमहानगरको मेयरमा कांग्रेस नगर सभापति हेमकर्ण पौडेल तथा उपमेयरमा नेकपा एकीकृत समाजवादी पार्टीका केन्द्रीय सदस्य केशवकुमार बिष्ट चुनावी मैदानमा उत्रिएका छन् ।