इटहरीः संयुक्त गठबन्धनका तर्फबाट इटहरी उपमहानगरपालिकाको मेयर पदका लागि चुनावी दौडमा रहेका नेपाली कांग्रेसका नगर सभापति हेमकर्ण पौडेलले आफू विजयी भए नगरलाई डुबानमुक्त बनाउने वाचा गरेका छन् ।

हरेक वर्ष डुबानको कारण ठुलो धनजनको क्षति हुने गरेको भन्दै उनले डुबानको त्रासबाट मुक्ति दिलाउने बताएका हुन् । नगरमा डुबानको समस्या हल गर्न आफूले सेराखोला, बुढिखोला र टेँग्राखोलाको उचित व्यवस्थापन गर्ने पौडेलको भनाइ छ । अन्य दलहरुले झुठो आश्वासन मात्र बाँडेर जनताको समस्यामाथि राजनीति गरिरहेको बताउँदै उनले वास्तविक परिणाममुखी काम आफू निर्वाचित भएको दिनदेखि सुरु हुने उल्लेख गरे ।

गैरी गाउँका जनतालाई तटबन्धको आस देखाएर भोट माग्नेहरू अहिले बेखबर भएको बताउँदै उनले आफू निर्वाचित भएको पहिलो दिन देखी दीर्घकालीन समस्या समाधानमा लाग्ने उद्घोष गरे । चुनावी नारामा मात्र सीमित नबनाई आफूले जनताले अनुभुत गर्नेगरी डुबानको समस्या निराकरण गर्ने उनले बताए । साथै उनले आफू निर्वाचित भए राजनीतिक आस्थाका आधारमा पूर्वाग्रह नराखी सबैको साझा जनप्रतिनिधिका रुपमा काम गर्नेसमेत प्रष्ट पारे ।