इटहरी । इटहरी उपमहानगरमा पछिल्लो समय कर्मचारी सरुवाको विषयलाई लिएर कार्यपालिका सदस्यहरू असन्तुष्ट देखिएका छन् । आव ८०।८१ लागे लगत्तै उपमहानगरले विभिन्न वडा कार्यालय तथा स्वास्थ्य कार्यालयहरूमा कर्मचारीहरूको व्यापक हेरफेर गरेको थियो ।

सोही विषयलाई लिएर निर्वाचित जनप्रतिनिधिहरूले असन्तुष्ट व्यक्त गरेका छन् । उपमहानगरकी उपमेयर सङ्गीता चौधरी सहित २४ जना कार्यपालिका सदस्यहरूले प्रमुख प्रशासकीय अधिकृत राम चरित्र मेहतालाई ज्ञापन पत्र समेत बुझाएका छन् ।

उनीहरूले अनाहक रूपमा कर्मचारी सरुवा गर्दा वडा कार्यालयहरूमा झन्झट भएको टिप्पणी गरेका छन् । उपमहानगरले गरेको कर्मचारी सरुवा मापदण्ड विपरीत रहेको र पूर्वाग्रह राखेर सरुवा गरिएको कार्यपालिका सदस्यहरूले आरोप लगाएका छन् ।

उपमहानगरले हुँदै नभएको शाखा महाशाखा खडा गरेको र भएका महाशाखाहरू हटाएर मनपरी ढङ्गले कर्मचारी सरुवा गरेको कार्यपालिका सदस्यहरूले आरोप लगाएका छन् । उनीहरूले सरुवा भएका कर्मचारी तत्काल फिर्ता बोलाइनुपर्ने अन्यथा आन्दोलनमा उत्रने चेतावनी समेत दिएका छन् ।