इटहरी । आगामी मंसिर ४ मा हुने आम निर्वाचनका लागि उम्मेदवारहरुको टुंगो लाग्न र मनोनयन दर्ता हुन बाँकी नै छ । तर, चलचित्रमा ‘हिम्मतवाली’को परिचय बनाएकी नायिका रेखा थापालाई भने चुनाव लागिसकेको छ । राप्रपाबाट आफ्नो नाम सिफरिस भएसँगै रेखा मोरङ ३ मा चुनाव प्रचार गर्दै घरदैलो अभियानमा खटिएकी छिन् ।

मोरङको क्षेत्र नम्बर ३ अन्तरगत पर्ने सुन्दर हरैंचा, बेलबारी, कानेपोखरी र पथरी शनिश्चरेका गाउँमा रेखाले चुनावी प्रचार शुरु गरेकी हुन् ।यसक्रममा उनले ज्येष्ठ नागरिकहरुबाट आशिर्वाद थाप्ने, वालवालिकालाई बोक्ने, महिला एवं किशोरीहरुसँग तस्वीर खिच्ने अनि चौतारो र टोल टोलमा मानिसहरुसँग सम्वाद गर्ने क्रम अगाडि बढाएकी छिन् ।

नायिका रेखा थापालाई गाउँमा देखेपछि मानिसहरुले उत्साहका साथ उनीसँग तस्बिर खिचाइरहेको देख्न सकिन्छ ।मोरङ क्षेत्र नम्बर तीनबाट नेकपा एमालेका तर्फबाट पूर्वस्वास्थ्यमन्त्री भानुभक्त ढकाल उठ्ने चर्चा छ । त्यस्तै कांग्रेसका तर्फबाट मेडिकल व्यवसायी सुनील शर्माको नाम चर्चामा छ । शर्मा र ढकालसँग प्रतिस्पर्धा गर्न लागेकी राप्रपा नेतृ थापा भने सबैभन्दा पहिले चुनावी अभियान लिएर गाउँ पसेकी छिन् ।यसैबीच एमाले नेता ढकाल पनि आफ्नो चुनाबी क्षेत्रमा पुगेका छन् । कांग्रेसका भावी उम्मेदवार शर्मा चाहिँ दुबई भ्रमणमा निस्किएका छन् ।