इटहरी । सुनसरीको इटहरीमा शुक्रबार राति पिकअप गाडीले ठक्कर दिँदा मोटरसाइकल चालकको मृत्यु भएको छ । मोटरसाइकलमा सवार अर्का एक युवक गम्भीर घाइते भएका छन् ।प्रहरीका अनुसार कोसी लोकमार्गअन्तर्गत इटहरी उपमहानगरपालिका–२ मा दुर्घटना भएको हो ।

धरानबाट इटहरीतर्फ आउँदै गरेको प्रदेश १–०२–००२ च ४६६२ नम्बरको पिकअपले इटहरीतर्फ नै आउँदै गरेको को १६ प ५७२० नम्बरको मोटरसाइकललाई राति ८ बजेतिर ठक्कर दिएको प्रहरीले जनाएको छ । 

दुर्घटनामा मोटरसाइकल चालक इटहरी–२ का २८ वर्षीय लोमश दाहाल र पछाडि सवार इटहरी–५ का सरोज गुरागाईं गम्भीर घाइते भएका थिए । घाइतेमध्ये दाहालको उपचारका क्रममा आर्या न्युरो अस्पताल विराटनगरमा राति १० बजेतिर मृत्यु भएको प्रहरीले जनाएको छ । गुरागाईंको उपचार जारी छ । 

दुर्घटनालगत्तै पिकअप चालक फरार बनेका छन् । उनको खोजी भइरहेको जानकारी प्रहरीले दिएको छ । प्रहरीका अनुसार पिकअपको तीव्र गतिका कारण दुर्घटना भएको प्रारम्भिक अनुसन्धानबाट खुलेको छ ।