इटहरीः सुनसरीको धरान उपमहानगरपालिकाको मेयर पदमा स्वतन्त्र उम्मेदवार हर्क साम्पाङ विजयी भएका छन् ।

१९ हजार पाँच सय ९७ मत प्राप्त गरी साम्पाङ धरानको मेयरमा निर्वाचित भएका छन् । यद्धपि मतगणना भने जारी नै रहेको निर्वाचन अधिकृतको कार्यालय धरानले जनाएको छ । तीन हजार दुई सय ८५ मत गणना गर्न बाँकी रहेको बताइएको छ । गणना गर्न बाँकी मतभन्दा साम्पाङको अग्रता बढी मतको भएकाले उनी विजयी भएका हुन् ।

उनका निकटतम प्रतिद्वन्द्वी नेपाली कांग्रेसका उम्मेदवार किशोर राईले हालसम्म १५ हजार तीन सय १६ मत पाएका छन् भने नेकपा एमालेकी उम्मेदवार मञ्जु भण्डारी (सुवेदी) ले १२ हजार तीन सय ४८ मत पाई तेस्रो स्थानम रहेकी छन् । नवनिर्वाचित मेयर साम्पाङ र निकटतम प्रतिद्वन्द्वी राईबीच हालसम्म चार हजार दुई सय ८१ मतको अन्तर रहेको छ ।

यता, उपमेयरतर्फ पनि बाम लोकतान्त्रिक गठबन्धनका तर्फबाट उम्मेदवारी दिएका नेकपा माओवादी केन्द्रका आइन्द्रविक्रम बेघाको विजय निश्चितप्रायः बनेको छ । बेघाले हालसम्म १९ हजार दुई सय ८३ मत पाएका छन् भने उनका निकटतम प्रतिद्वन्द्वी एमालेका उम्मेदवार पदम इस्वो लिम्बूले १६ हजार नौ सय १६ मत पाएका छन् ।

दुवै उम्मेदवारबीच दुई हजार तीन सय ६७ मतको अन्तर छ । २० वडाहरु रहेको धरानमा अब १७ नम्बर वडाको मात्र मतगणना सम्पन्न हुन बाँकी छ । धरानमा कुल ६२ हजार आठ सय ९८ मत खसेकोमा ५९ हजार ६ सय १३ मतको गणना सम्पन्न भएको छ ।