काठमाडौँ । धरान उपमहानगरपालिकाका मेयर हर्क साम्पाङ राईले कोशीको पानी धरान ल्याउने योजना (प्रोजेक्ट) मा बजेट नपरे धरानमा सांसदहरुलाई निषेध गर्ने चेतावनी दिएका छन् ।

सामाजिक सञ्जालमार्फत मेयर राईले भनेका छन्, ‘यसपालिको बजेटमा कोशीको पानी ल्याउने प्रोजेक्ट परेन भने माननीय ज्यूहरूलाई धरानमा निषेध गरिने छ ! तल तीनकुनेमै बोर्ड राखिने छ फोटोसहितको ! ख्याल नठान्नु होला ! यो फेसबुक चलाउने मान्छे धरानको नगर प्रमुख हो भन्ने नभुल्नु !’

राईको यो अभिव्यक्तिमा काठमाडौँ महानगरका मेयर बालेन शाहले पनि समर्थन जनाएका छन् । राईको स्ट्याटसमा शाहले लेखेका छन्, ‘पूर्ण समर्थन, गर्ने नै यही हो ।’ मेयर राईको स्टाटसमा समर्थन जनाइरहेका बेला काठमाडौं महानगर र केन्द्र सरकारबीच पनि असमझदारी बढिरहेको छ । महानगरले बालुवाटारको फोहोर उठाउन रोकेको छ । काठमाडौंका मेयर बालेन शाहले विभिन्न १४ कारण देखाउँदै बालुवाटारको फोहोर उठाउन रोकेका छन् ।