मंगलबार आयोजित पत्रकार सम्मेलनमार्फत आयोजकले कार्यक्रमको योजना र उद्देश्यबारे जानकारी दिएका हुन्। सम्मेलनमा बोल्दै गौशालाका संस्थापक संरक्षक दिनबन्धु शास्त्रीले मन्दिरमा भगवानको प्राणप्रतिष्ठा यही वैशाख १८, १९, र २० गते पं. भवानीशंकर निरौलाको करकमलबाट सम्पन्न हुने बताए। उनका अनुसार भगवान शिवको मूर्ति भारतीय कलाकारहरूले हस्तकला प्रविधिबाट निर्माण गरेका हुन्, जसलाई चन्दादाताहरूको सहयोगमा खरिद गरिएको हो।

त्यसैगरी, “सेवाका सारथि” पुस्तकको लोकार्पण वैशाख २० गते बिहान ११ बजे गरिने जानकारी दिइयो। पुस्तक नयाँ वृन्दावन गौशालाका लागि अध्यक्ष गङ्गादेवी काफ्लेले प्रकाशन गरेकी हुन्। काफ्लेको जीवन, संघर्ष, शिक्षा र सेवामा आधारित यस कृतिले नेपाली शिक्षाक्षेत्रमा प्रेरणादायी योगदान पुर्‍याउने विश्वास व्यक्त गरिएको छ। पुस्तकमा काफ्लेको सुकुना बहुमुखी क्याम्पसको स्थापना र व्यवस्थापनमा खेलेको भूमिकालाई विशेष स्थान दिइएको छ।

कार्यक्रमसँगै अर्काे ऐतिहासिक योजना पनि तयारी चरणमा रहेको जानकारी दिइएको छ। विज्ञान गृह स्थापना सम्बन्धी रहेको उक्त योजना हाल ‘गर्भमै’ भए पनि निकट भविष्यमा नेपाल ज्योतिष परिषद् कोशी प्रदेशको सहकार्यमा कार्यान्वयनमा ल्याउने तयारी भइरहेको शास्त्रीले बताए।