इटहरी । पूर्वपश्चिम राजमार्गमा अन्तर्गत मोरङको मालती पुल नजिकै गाडिएको अवस्थामा चार वटा सिलिण्डर बम भेटिएका छन् । पूर्वपश्चिम राजमार्गका मोरङको सुन्दरहरैँचा नगरपालिका– ७ स्थित मालती पुल नजिकै गाडिएको अवस्थामा उक्त बम भेटिएको हो ।

पुल नजिकै फेला परेकामध्ये एउटा सिलिण्डर बम डिस्पोज गरिएको छ । नेपाली सेनाको टोलीले बम डिस्पोज गरेको हाे । बम रहेको हल्ला चलेपछि खोजीका लागि पूर्वपश्चिम राजमार्ग खण्डमा नेपाली सेना र नेपाल प्रहरीको टोली परिचालन गरिएको थियो ।

खोजतलासका क्रममा मालती पुलबाट क्रिब १० मिटर पश्चिममा सुरुङ खनेर राखिएको अवस्थामा बिहीबार दिउँसो चार वटा सिलिण्डर बम फेला परेको मोरङ प्रहरीले जनाएको छ । बम रहेको सूचना आएपछि प्रहरीले राजमार्ग बन्द गरेर बमको खोजी गरेको थियो । खोजी गर्ने क्रममा दिउँसो बम फेला पारेको हो । माओवादी द्वन्द्वकालमै बम राखिएको सूचना आएको थियो । सूचना लगत्तै पूर्व–पश्चिम राजमार्गअन्तर्गत करिब २ किलोमिटर सडकमा सवारी आवागमनमा रोक लगाइएको थियो ।