इटहरी । माेरङकाे सुन्दरहरैँचा नगरपालिकाले पूर्वतयारीको लागि भूउपयोग सम्बन्धी योजना तर्जुमाकाे काम शुरू गरेको छ । सरकारले भूउपयोग नीति लागू गरी जमिनको वर्गीकरण गर्न लागेको हुनाले यसकाे पूर्व तयारीका लागि काम शुरू गरिएको सुन्दरहरैँचा नगरपालिकाका नगर प्रवत्ता राेशनप्रसाद ढकालले जानकारी दिए । उनले नगरपालिकाले पिकासो कन्सल्टेन्सी इटहरीकाे प्राविधिक मार्फत जमिनको वर्गीकरणको काम सहज बनाउन वडास्तरमा अन्तरक्रिया कार्यक्रम शुरु गरेको बताए ।

नगरकाे वडा न. १० र १२ मा प्रारम्भिक चरणको काम शुरू भएको छ । विद्यमान भूउपयोग अवस्था, भूमिको उर्वरता, जनसंख्या प्रक्षेपण, जग्गाको मूल्य, जग्गाको खण्डीकरण दरलगायतलाई आधार मानेर काम गरिने परामर्शदाता तारा खतिवडाले अन्तरक्रिया कार्यक्रम मार्फत जानकारी गराइन् ।

नगरमा भूउपयोग परिषद्को काम नगर कार्यपालिकाले नै गरी जमिनको वर्गीकरण गर्ने काम पूरा हुनेछ परामर्श दाता खतिवडाले बताइन् । उनले कृषि क्षेत्रका लागि न्यूनतम २ कठ्ठा र आवास क्षेत्रका लागि न्यूनतम साढे सात धुर जग्गा हुनु अपरिहार्य रहेको उल्लेख गदै स्थानीयसँगको सहकार्यमा कृषि, आवास, उद्योग, वन, जलाधार लगायतका क्षेत्रमा जग्गाको वर्गीकरण गरिने बताइन् ।

यस अघि प्रचलित अब्बल, दोयम, सिम र चहार भनी गरिएको वर्गीकरणलाई नयाँ वर्गीकरणले विस्थापन गर्ने उल्लेख गरिएको छ। पहिलो चरणमा तथ्याङ्क लिएर नक्साङ्कन गरिने र थप काम अघि बढाइने नगर प्रबक्ता ढकालले बताए ।