मोरङ । मोरङको बूढीगंगाका एक पुरुष हाइटेन्सन प्रसारणलाईनमा चढेका छन् । बूढीगंगा  गाउँपालिका–७ डंग्राहाका ४० वर्षीय दिनेश माझी १ लाख ३२ हजार भोल्टको प्रसारण लाइनमा चढेका हुन् ।सडकमा निर्माण भइरहेको रिटेनिङ वालको निर्माणको काम रोक्न माग राख्दै आज विहान ६ बजे हाइटेन्सन लाइनमा चढेका हुन् । 

उनलाई उतार्ने प्रयास भइरहेको जिल्ला प्रहरी कार्यालय मोरङका डिएसपी रञ्जनकुमार दाहालले बताए । सडकमा निर्माण भइरहेको रिटेनिङ वालको निर्माणको काम गुणस्तरीय नभएको भन्दै काम रोक्न उनी चढेका थिए । उनलाई उतार्नका लागि परिवार, आफन्त, प्रहरीले र वडाध्यक्षले प्रयास गरेका थिए । 

तर उनले गाउँपालिका अध्यक्ष जितनारायण थापामगर र उपाध्यक्ष अमृताकुमारी गच्छदार आएर काम रोक्ने प्रतिवद्धता जनाउनु पर्ने माग गरेका छन् ।

अध्यक्ष र उपाध्यक्ष भने धनकुटामा छन् । ‘उद्दारका लागि हामी चढ्दा हाम फाल्ने डर छ, उहाँले अध्यक्ष नै आउनुपर्छ भन्नु भएको छ’, डिएसपी दाहालले भने, ‘अध्यक्ष उपाध्यक्षज्यूलाई चाडो आइदिनुहोस् भनेका छौं ।’ उनले आफ्नो मागलाई वेवास्ता गरे आत्महत्या गर्ने चेतावनी समेत दिएका छन् ।