लेटाङ । मोरङको लेटाङ नगरपालिकाले ११ औं नगरसभाको अवसर पारेर विभिन्न क्षेत्रका व्यक्ति तथा विद्यालयलाई सम्मान गरेको छ ।  नगरपालिकाले नगरको उत्कृष्ट विद्यालय, उत्कृष्ट कृषक र चर्चित मूर्तिकारलाई सम्मान गरेको हो ।

 नगरपालिका भित्रका सामुदायीक विद्यालयहरुमध्ये सिकाइ क्षमतामा सबैभन्दा उच्च अंक हासिल गर्न सफल लेटाङ २ स्थित लक्ष्मी माध्यमिक विद्यालयलाई नगद २ लाख सहित सम्मान गरिएको छ । विद्यालय व्यवस्थापन  समितिका अध्यक्ष हेरम्बराज भट्टराई, प्रधानाध्यापक राजेन्द्र खतिवडा, सहायक प्रधानाध्यापक देवराज सापकोटा लगायतले सम्मानपत्र ग्रहण गर्नुभयो । यस्तै मेयर उत्कृष्ट कृषक पुरस्कार २०७९ बाट ३ वटा कृषि फर्मलाई नगद रु ३० हजारसहित सम्मान गरिएको छ ।

सम्मानि हुनेहरुमा लेटाङ २ स्थित हातेमालो कृषि तथा पशुपन्छी ह्याचरी फमका राधा दाहाल, लेटाङ ३ स्थित पुष्प स्मृति कृषि नर्सरीका आनन्द सागर तिम्सिना र लेटाङ ३ कै ललितकला कृषि फर्मका ललित श्रेष्ठ रहेका छन् । यसैगरि नगरपालिकाले लेटाङ २ घर भइ लामो समयदेखि मूर्तिकलामा कृयाशील चर्चित मूर्तिकार नवीन सुवेदीलाई समेत सम्मान गरेको छ ।

मूर्तिकलाको क्षेत्रबाट नगर तथा देशलाई चिनाउन योगदान दिएको भन्दै नगरपालिकाले सुवेदीलाई सम्मानपत्र सहित दोसल्ला ओडाएर सम्मान गरेको छ । सम्मान कार्यक्रममा नगर प्रमुख भूपेन्द्र कुमार लावती, उपप्रमुख कृष्णकुमारी निरौला, प्रमुख प्रशासकीय अधिकृत पुरुषोत्तम घिमिरे लगायतले सबै व्यक्तिहरुलाई सम्मान गर्नुभयो । कार्यक्रममा सबै वडाका वडाध्यक्ष, कार्यपालिका सदस्यहरु, वडासदस्यहरु, सम्मानित व्यक्तित्वहरु तथा सञ्चारकर्मीहरुको सहभागिता रहेको थियो ।