धनकुटा । धनकुटाको सहिदभूमि गाउँपालिका ५ का वडाध्यक्ष सन्तोष राई (३८) लाई युवती बलात्कार गरेको आरोपमा प्रहरीले पक्राउ गरेको छ ।होटलमा बन्धक बनाइ बलात्कार गरेको युवतीले जाहेरी दिएपछि राईलाई पक्राउ गरिएको प्रहरीले जनाएको छ ।

राईलाई शनिबार राति साढे ११ बजे धनकुटा बजार नजिकबाट पक्राउ गरिएको हो ।  जिल्ला प्रहरी कार्यालय धनकुटाका डीएसपी चिरञ्जिवी दाहालका अनुसार राईले शुक्रबार राति धनकुटाको हिलेबाट तेह्रथुमको बसन्तपुर बजारस्थित एक होटलमा लगेर बन्धक बनाई बलात्कार गरेको जाहेरी परेपछि पक्राउ गरिएको हो ।

घटना भएको स्थान तेह्रथुम जिल्ला भएकोले पक्राउ गरिएका राईको थप कारबाही प्रक्रियाका लागि तेह्रथुम प्रहरीलाई बुझाइने उनले जानकारी दिए । घटनाबारे थप अनुसन्धान भइरहेको प्रहरीले जनाएको छ ।