झापा । झापाको भद्रपुरमा ओमप्रकाश गोयल कोलोनी मार्गको उद्घाटनसँगै विपन्न परिवारलाई १४ वटा पक्की घर हस्तान्तरण गरिएको छ ।झापा उद्योग वाणिज्य सङ्घका पूर्व अध्यक्ष ओमप्रकाश गोयलको स्मृतिमा उनका भाइहरू महावीर, दिनबन्धु र राजकुमार गोयलले भद्रपुर नगरपालिका–६ भतियावारीमा विपन्न परिवारलाई पक्की घर बनाइदिनुका साथै कोलोनी मार्ग निर्माण गरेका थिए ।

आइतबार अक्षय तृतीयाको अवसर पारेर राष्ट्रियसभा सदस्य गोपालकुमार बस्नेत र भद्रपुर नगरपालिका प्रमुख गणेश पोखरेलले सो कोलोनी मार्गको उद्घाटन गर्दै विपन्न परिवारलाई घर हस्तान्तरण गरेका थए । सो बस्तीमा बसोबास गर्ने आदिवासी/जनजाति समुदायका विपन्न परिवारलाई गोयल दाता परिवारले लस्करै एउटै किसिमका १४ वटा घर बनाइदिएका हुन् ।

आफ्नै जग्गामा नयाँ घर पाउनेहरू राजो माझी, श्याम माझी, रमेश माझी, नारायण राजवंशी, फूलकुमार राजवंशी, प्रमीला राजवंशी, भेलासरी राजवंशी, सुमित्रा माझी, लखन माझी, रवीन माझी लगायत रहेका छन् । निर्मला राजवंशी र विजयकुमार माझीले पक्की घर बनाइसकेको उनीहरूको घरको मर्मत सम्भार र रंगरोगन गरिएको थियो ।

नयाँ घर पाएपछि उनीहरू दङ्ग परेका छन् । दाता परिवारले ६० लाखभन्दा बढी खर्चिएर घरहरू बनाइदिएको बताइएको छ । भद्रपुर –६ नम्बर वडा अध्यक्ष रतिया राजवंशीको अध्यक्षता भएको कार्यक्रममा राष्ट्रियसभा सदस्य बस्नेत, नगर प्रमुख पोखरेल, उपप्रमुख राधा कार्की, नेपाल उद्योग वाणिज्य महासङ्घका केन्द्रीय सदस्य उमेश डालमिया, झापा उद्योग वाणिज्य सङ्घका अध्यक्ष नवराज पनेरु, सहायक प्रमुख जिल्ला अधिकारी विश्वराज नेपाल, ४ नम्बर वडा अध्यक्ष हंशधर राजवंशी, शंकरलाल अग्रवाल, तुलाराम राजवंशी, लखन माझी लगायतले मन्तव्य राखेका थिए ।

स्वागत मन्तव्य दाता तथा समाजसेवी दीनबन्धु गोयलले राखेको कार्यक्रमको सञ्चालन गोपाल गिरीले गरेका थिए ।