इटहरी । प्रदेश १ का प्रहरी प्रमुख डिआइजी (प्रहरी नायव महानिरीक्षक) सुदीप गिरीले अपराधरहित समाज निर्माणलाई पहिलो प्राथमिकतामा राखेर काम गर्न प्रहरी कर्मचारीलाई निर्देशन दिएका छन् । 

प्रदेश प्रहरी प्रमुखका रूपमा हाजिर भएर पदभार ग्रहण गरेलगत्तै बिहीबार उनले कानुनको परिधिमा रहेर जनचाहना बमोजिम प्रहरीले सेवा प्रदान गर्नुपर्नेमा जोड दिए । आचरण र व्यवहारमा सुधार ल्याएर अपराधरहित समाज निर्माणमा अहोरात्र लाग्न प्रहरीलाई गिरीको निर्देशन छ । 

‘अपराधरहित समाज निर्माण अहिलेको पहिलो प्राथमिकतामा हो,’ निर्देशन दिँदै उनले भने, ‘कानुनको परिधिमा रहेर समाजमा हुने अनेक प्रकारका अपराध नियन्त्रणमा प्रहरी केन्द्रित हुनुपर्छ ।’ गृह मन्त्रालयको असार १९ गतेको निर्णयअनुसार एसएसपी (प्रहरी वरिष्ठ उपरीक्षक)बाट बढुवा भएर डिआइजी बनेका गिरीलाई सरकारले प्रदेश १ प्रहरी प्रमुखका रूपमा पदस्थापन (सरुवा) गरेको हो । 

नेपाल प्रहरीभित्र उनको विवादरहित छवि छ । यसअघि विशेष ब्युरो, सिआइबी, अपराध महाशाखाजस्ता महत्वपूर्ण स्थानको जिम्मेवारी सम्हालिसकेका छन् । गिरी अपराध अनुसन्धान र अन्तर्राष्ट्रिय आतङ्कवाद नियन्त्रणमा विशेष दखल राख्ने उच्च प्रहरी अधिकृत हुन् । 

यसअघि विभिन्न ठाउँमा भएका चर्चित र जघन्य प्रकृतिका अपराधको अनुसन्धानलाई निस्कर्षमा पुर्याउन उनी सफल भइसकेका छन् । गिरीले विभिन्न जिल्ला प्रहरी कार्यालय र काठमाडौं प्रहरी परिषरमा समेत सफल नेतृत्व गरिरहेका छन् ।