इटहरी । २०७४ सालको तुलनामा झण्डै १ लाख ६२ हजार ५२२ बढी मत सदर हुँदा प्रदेश १ मा २०७९ को निर्वाचनमा भने चार ठूला पार्टीले पहिलेको जति पनि मत ल्याउन सकेनन् ।२०७४ सालमा कूल सदर मत १७ लाख ३६ हजार ६२२ थियो । भर्खरै सम्पन्न निर्वाचनमा भने प्रदेशसभाको समानुपातिकमा खसेको कूल सदरमत १८ लाख ९९ हजार १४४ छ ।

यसमध्ये सबैभन्दा ठूलो दल बनेको नेकपा एमालेले ६ लाख ६५ हजार ४६० मत पाएको छ । एमालेले २०७४ सालमा प्रदेशसभामा ६ लाख ७३ हजार ७०९ मत पाएको थियो । अहिले एमालेले पाएको मत ०७४ सालको मतभन्दा ८ हजार २४९ कम हो ।यस्तै नेपाली काँग्रेसले यो पटक ५ लाख ६२ हजार ९५६ मत पाएको छ । यो मत ०७४ सालको भन्दा २३ हजार २९० कम मत हो ।

०७४ सालमा काँग्रेसले ५ लाख ८६ हजार २४६ मत ल्याएको थियो ।माओवादी केन्द्रले पनि अघिल्लो निर्वाचनमा भन्दा यो निर्वाचनमा २५ हजार ५३६ कम मत पाएको छ । माओवादी केन्द्रले ०७४ मा २ लाख ६ हजार ७८१ मत पाउँदा भर्खरै सम्पन्न निर्वाचनमा भने १ लाख ८१ हजार २४५ मत मात्रै पाएको छ ।

यस्तै अघिल्लो पटक प्रदेशसभामा प्रत्यक्षमा १ र समानुपातिकमा २ गरी तीन सांसद रहेको चौथो ठूलो दल बनेको तत्कालिन संघीय समाजवादी र हालको जसपाले यो पटक झनै खुम्चिएको छ । जसपाले २०७४ सालमा ७० हजार ४५६ मत पाउँदा यो पटक त्यो भन्दा ८ हजार ७५३ कम अर्थात् ७१ हजार ७२३ मत पाएको छ । जसपाले यो पटक सांसद संख्या पनि जम्माजम्मी समानुपातिकबाट १ जना मात्रै पाउने निश्चित बनेको छ । प्रत्यक्षतर्फ उसले एक जना पनि जिताउन सकेको छैन ।

राप्रपाले भने अघिल्लो पटकको तुलनामा यस पटक सिट संख्यामा गुणात्मक छलाङ मार्ने देखिएको छ । अघिल्लो निर्वाचनमा १ जना सांसदको प्रतिनिधित्व गरेको राप्रपा यो पटक झण्डै आधा दर्जन सांसद प्रदेशसभामा उपस्थिति हुनेछन् । राप्रपाले २ जना सांसद प्रत्यक्षमा जित्दा समानुपातिक तर्फ भने अघिल्लो पटकको तुलनामा झण्डै तीन गुणा बढी मत ल्याएको छ ।

राप्रपाले ०७४ सालमा ५७ हजार ३४२ मत ल्याएको थियो । यो पटक भने त्यो भन्दा १ लाख ४१ हजार १६९ मत बढाउँदै उसले मतसंख्या झण्डै २ लाख पुर्याएको छ भने प्रदेशसभामा समानुपातिक मत पाउनेमा तेस्रो स्थान कायम गरेको छ । उसले माओवादी केन्द्रलाई उछिनेको हो । राप्रपाले समानुपातिक सिट संख्या ४ थप गर्दै प्रदेशसभामा ६ जनाको प्रतिनिधित्व गराउने भएको छ ।

यता अघिल्लो पटक भन्दा ४०८ मत बढाउँदै २६ हजार ५३१ मत पाएको भएपनि संघीय लोकतान्त्रिक राष्ट्रिय मञ्च प्रदेशसभामा समानुपातिक सिट संख्या पाउने हकबाट वञ्चित भएको छ । उसले प्रदेशमा समानुपातिक सिट पाउनका लागि चाहिने १ दशमलव ५ प्रतिशत मत पुर्याउन नसक्दा उसको प्रतिनिधित्व नहुने भएको हो ।

यस्तै एमालेबाट विभाजित भएर बनेको नेकपा (एकीकृत समाजवादी)ले भने प्रत्यक्षमा ३ र समानुपातिकमा एक सिट ल्याउँदै ४ जनाको प्रतिनिधित्व गर्ने भएको छ । समाजवादीका यसअघि १० जना प्रदेशसभा सदस्य थिए ।