धरान । धरान १६ स्थित भगवती आधारभुत विद्यालयका प्रधानाध्यापक अच्युत पराजुलीले सार्वजनिक सुनुवाईमा जनप्रतिनिधिले स्कूललाई वेवास्ता गरेको गुनासो गरेपछि मंगलबार विहान विद्यालयमा धरानका जनप्रतिनिधि पुगेका छन् । विद्यालयमा विहान ७ बजे नै धरान उपमहानगरपालिकाका मेयर हर्क साम्पाङ र उपमेयर अइन्द्रबिक्रम बेघासहितको टोली पुगेको थियो ।

विद्यालयका प्रअ पराजुली, व्यवस्थापन समितिका कार्यवाहक अध्यक्ष सुनिल नेपाललगायतले विद्यालयको अवस्था, समस्या र भावी योजनाबारे स्थलगत निरीक्षण गराउँदै मेयर र उपमेयरलाई मागपत्र पनि पेश गरे । मेयर साम्पाङले ज्ञान हासिल गर्ने थलो विद्यालयको अवस्था नाजुक देखेपछि सबैले सरकारी संरचनाहरुलाई माया गर्नुपर्ने बताएका थिए । उपमेयर अइन्द्रबिक्रम बेघाले स्रोतले भ्याएसम्म विद्यालयलाई उपमहानगरको तर्फबाट सहयोग गर्ने प्रतिबद्धता जनाएका छन् ।