इटहरी । तीनकुनेमा चैत १५ गते भएको हिंसात्मक प्रदर्शनका कमान्डर दुर्गा प्रसाईं १३ दिनदेखि प्रहरी हिरासतमा छन्। चैत २८ गते भारतको आसामबाट पक्राउ परेका प्रसाईंलाई अर्को दिन नेपाल ल्याएर जिल्ला प्रहरी परिसर काठमाडौंमा राखिएको हो।

काठमाडौं जिल्ला अदालतले पहिलोपटक १२ दिनको म्याद थप गरेपछि बुधबार पुनः ३ दिनको म्याद थपिएको छ। थप हिरासत आवश्यक परे आइतबार पुनः अदालतमा पेश गरिनेछ।

प्रसाईंविरुद्ध आपराधिक उपद्रव, राज्यविरुद्धको अपराध, ज्यान मार्ने प्रयास, कर्तव्य ज्यान र संगठित अपराधलगायत पाँचवटा अभियोगमा अनुसन्धान भइरहेको छ। उनीसँगै पक्राउ परेका २४ जनालाई राज्यविरुद्धको कसुरमा अनुसन्धान भइरहेको छ भने अन्य ६१ जनालाई आपराधिक उपद्रवमा अनुसन्धान गरिएको छ। हालसम्म २१ जना थुनामुक्त भएका छन्, तर उनीहरू पनि मुद्दामा संलग्न हुनसक्ने प्रहरीको भनाइ छ।

प्रसाईंसँगै भारत भागेका उनका अंगरक्षक दीपक खड्का पनि पक्राउ परेका छन्। उनीहरूलाई छुट्टाछुट्टै कोठामा राखिएको छ। क्यान्सरको बिरामी भएका कारण प्रसाईंले आफ्ना सहयोगीहरूलाई पनि सँगै राख्न अनुरोध गरेका थिए। यसपछि पूर्वसैनिक रामकुमार धिमाललाई सँगै राखिएको छ।

प्रसाईं र उनका सहयोगीहरूसँग तीनकुने घटनाबारे सोधपुछ भइरहेको छ, तर उनीहरूले संलग्नता अस्वीकार गरेका छन्। अनुसन्धान अधिकारीहरूका अनुसार प्रसाईंले विरोधाभासी बयान दिइरहेका छन्।

प्रसाईंले फेरि स्वास्थ्यका आधारमा थुनामुक्तिको माग गर्दै अदालतमा निवेदन दिन तयारी गरिरहेको स्रोत बताउँछन्।