झापा ।  बैक तथा वित्तीय संस्थाका कारण व्यवसायीहरु मारमा परेका भन्दै व्यवसायीको पक्षमा सहज र नरम बन्न बिर्तामोड उद्योग वाणिज्य संघले आग्रह गरेको छ ।कोरोना संक्रमणका कारण व्यवसाय धरासायी बनिरहेको साथै रुस र युक्रेनको युद्धपछि आर्थिक संकटको शुरुवात भएको भन्दै बिर्तामोड उद्योग वाणिज्य संघले यस्तो असहज परिस्थितमा बैंकले व्यवसायीलाई कर्जा उठाउन ताकेता नदिन आग्रह गरेको छ ।

असारमसान्तका नाममा विभिन्न व्यवसायीलाई वित्तीय क्षेत्र विशेष गरेर क र ख वर्गका बैंकले महिना दिन अगावै व्याज र किस्ताको ताकेता गरेकोप्रति बिर्तामोड उद्योग वाणिज्य संघको गम्भीर ध्यानाकर्षण भएको शुक्रवार जारी प्रेस विज्ञप्तिमा उल्लेख छ ।

बिर्तामोड उद्योग वाणिज्य संघको अध्यक्ष प्रकाश शिवाकोटीद्वारा हस्ताक्षरित विज्ञप्तिमा भनिएको छ– बैंकले अव्यवहारिक हिसाबले ताकेता गरिरहेको र व्याज र किस्ता नबुझाए लिलामीमा राख्ने, व्ल्याकलिष्ट गर्ने, धम्की दिनु दुःखद् भएको जनाएको छ ।

व्यापार सञ्चालनमा आर्थिक तरलताका कारण कठिनाई उत्पन्न भइरहेको अवस्थामा वित्तीय संस्थाले व्यवसायीलाई धरासायी बनाउने रणनीति लिनु जायज नभएको वाणिज्य संघले विज्ञप्तिमार्फत जनाएको छ ।

वित्तीय संस्थालाई सहज र व्यवहारिक तवरले व्यवसायीको समस्यालाई आत्मसात गर्दै स्थिति सहज बनाउन आग्रह गरेको छ । बिर्तामोड नगर क्षेत्रमा भएका बैंक तथा वित्तीय संस्थालाई तरलता अभावले बक्यौता नउठ्ने भएकाले केही समय धैर्य गरिदिन आग्रह समेत गरेको छ ।

वाणिज्य संघले आग्रह गर्दागर्दै पनि डर र धम्की देखाएर व्यवसायीलाई हतोत्साहित बनाउने भएमा आम व्यवसायी आन्दोलनमा उत्रिन सक्ने चेतावनी समेत दिएको छ । वाणिज्य संघले सरकारले बजेटमार्फत ल्याएको कम्प्युटर वा अनलाइन बिलिङप्रति पनि आपत्ति जनाएको छ ।

आर्थिक बर्ष २०७६।०७७ वा ०७७।०७८ मा बार्षिक १० करोड करोबार गर्न कुनै पनि प्रकृतिको व्यवसायले कम्प्युटर विलिङ गर्नुपर्ने कानूनी प्रावधान अव्यवहारिक र असान्दर्भिक भएको जनाएको छ । वाणिज्य संघले व्यवसायीको सिलिङ १० करोडबाट बढाएर ३५ करोड पु¥याउन आग्रहसमेत गरेको छ ।

बैंक तथा वित्तीय संस्थाका कारण बिर्तामोडका धेरै व्यवसायी पलायन हुनुपर्ने अवस्था आएको भन्दै वाणिज्य संघका प्रवक्ता सञ्जीव घिमिरेले आपत्ति जनाएका छन् । उनले कोरोना कहर अघि नियमित रुपमा व्याजदर तथा किस्ता तिरिरहेकोमा कोरोना कहरपछि केही समयपछि बैंक तथा वित्तीय संस्थालाई पटक–पटक आग्रह गरे पनि लिलामी नाम निकाल्नु दुःखद् भएको बताए । उनले बैक तथा वित्तीय संस्थालाई वाणिज्य संघकोतर्फबाट आग्रह गरिएको र तरलता सहज नभएसम्म वित्तीय क्षेत्रले समेत व्यवसायीको मागलाई सम्बोधन गर्नुपर्ने बताए ।

उनले धेरै व्यवसायीहरु प्रताडित भएको भन्दै यस्तो अवस्था सृजना हुनु दुःखद् भएको बताए । बैंक आफंै आर्थिक तरलतामा रहेको र देशनै आर्थिक संकटमा फस्ने अर्थविद्हरुको चेतावनी आइरहेको बेला व्यवसायीलाई हतोत्साहित बनाउने काम गर्नु दुःखद् भएको प्रवक्ता घिमिरेको भनाइ छ । उनले बिर्तामोडका बैंक तथा वित्तीय संस्थाले व्यवसायीहरुलाई दुःख दिने काम गरे त्यसबिरुद्ध व्यवसायीहरु आन्दोलनमा उत्रिन बाध्य हुने चेतावनी समेत दिए ।