इटहरीः मोरङको सुन्दरहरँैचा नगरपालिका–६ का ६४ वर्षीय देवीप्रसाद तामाङ र ३२ वर्षीय मणिकुमार तामाङलाई कुटपिट गरी व्यक्ति हत्या गरेको आरोपमा प्रहरीले पक्राउ गरेको छ ।

गत चैत्र ३० गते राती ९ः४४ बजे स्थानीय देवीप्रसाद तामाङ र ४१ वर्षीय गणेश भनिने मानबहादुर तामाङबीच सामान्य विवाद भई झै–झगडा भएको र बाबुलाई कुटपिट गरेको भनी देवीप्रसादका छोरा ३२ वर्षीय मणीकुमार तामाङले मानबहादुरलाई दाउराको चिर्पटले टाउकोमा प्रहार गर्दा उनी घाइते भएका थिए ।

घाइते मानबहादुरलाई उपचारको लागी विराटनगरको न्युरो अस्पताल लगिएकोमा उपचारको क्रममा बैशाख ३ गते बिहान मृत्यु भएको थियो । घटनालगत्तै फरार रहेका दुवै बाबु छोरालाई इलाका प्रहरी कार्यालय बेलबारीबाट खटिएको प्रहरी टोलीले बैशाख ३ गते नै पक्राउ गरेको हो भने घटना सम्बन्धमा थप अनुसन्धान भइरहेको प्रहरीले जनाएको छ ।