इटहरी । स्वास्थ्य बिमामार्फत बिरामीको उपचार गरेवापत सरकारले अस्पतालहरुलाई भुक्तानी गर्नुपर्ने रकम महिनौंसम्म नदिएपछि पूर्वी नेपालका ठूला निजी अस्पतालहरुले स्वास्थ्य बिमासँग सम्बन्धित उपचार सेवा बन्द गरेका छन् । 

विराटनगरस्थित नोबेल शिक्षण अस्पताल, मोरङको बूढीगङ्गास्थित विराट मेडिकल कलेज र झापाको बिर्तामोडस्थित बि एन्ड सी अस्पतालले एकैसाथ स्वास्थ्य बिमा कार्यक्रम बन्द गर्ने निर्णय गरेका हुन् । तीनवटै अस्पतालले बिमा कार्यक्रम बन्द गर्ने भन्दै आइतबार सूचना जारी गरेका छन् । 

अचानक सेवा बन्द गरेपछि उपचारमा आउने हजारौं विरामी समस्यामा परेका छन् । दुई साता अघि अस्पतालका सञ्चालकहरुले पत्रकार सम्मेलन गरेर जानकारी दिए अनुसार नोबेलले ५५ करोड, विराटले ४६ करोड र वि एण्ड सीले ४४ करोड रुपैंया पाउन बाँकी छ । सरकारले ठूलो रकम भुक्तानी गर्न बाँकी रहेको, भुक्तानीका लागि पटक पटक माग गर्दा पनि सुनुवाइ नभएपछि विमा सेवा बन्द गरिएको ती अस्पतालले जनाएका छन् ।

स्वास्थ्य विमा बोर्डले बक्यौता रकम भुक्तानी गर्नासाथ सेवा निरन्तर हुने जनाइएको छ ।साउन १ गतेबाट सरकारी तथा सामुदायिक स्वास्थ्य सेवा प्रदायक संस्थामा उपचार गराए मात्र विमा रकम भुक्तानी हुने सरकारको बजेट भाषणमा उल्लेख थियो । यसले गर्दा विमा रकम पाइने नपाइने भन्ने पनि दोधार भएको अस्पताल सञ्चालकहरुले बताएका छन् ।

महिनौंसम्म उपचारको ठूलो रकम भुक्तानी नहुँदा अस्पताल सञ्चालनमा असर पुगेको उनीहरुको भनाइ छ । थप औषधी किन्न, स्वास्थ्यकर्मीको तलव भुक्तानी गर्न र अन्य खर्च धान्न मुस्किल परेको सञ्चालकहरुको गुनासो छ ।