इटहरीः नेकपा एमाले इटहरी चुनावी अभियानमा उत्रिएकोे छ ।

नेकपा एमाले इटहरीका अध्यक्ष याम सुब्बाले हिजो एक कार्यक्रमका बीच २०२१ सदस्यीय निर्वाचन परिचालन समिति घोषणा गरेका छन् । एमाले केन्द्रीय सदस्य तैयव हुसेनको संयोजकत्वमा निर्वाचन परिचालन समिति घोषणा गरिएको हो । समितिको सह संयोजकहरुमा रामप्रसाद चौलागार्इँ, हिमाल सुवेदी प्रमोद शेर्पा र रोहित कार्की रहेका छन् ।

यस्तै सचिवमा रुपेश बस्नेत रहेका छन् । एमाले केन्द्रीय सदस्य तैयव हुसेनले अघिल्लो निर्वाचनको शाखलाई अझ सशक्त बनाउने गरी नेकपा एमाले इटहरी चुनावी मैदानमा उत्रिएको बताए । केन्द्रीय सदस्य इटहरी उपमहानगरपालिकाकी उपप्रमुख लक्ष्मी गौतमले इटहरी उपमहानगरपालिकामा पाँच वर्षमा भएका मुख्यमुख्य कार्यहरुबारे जानकारी दिइन् ।

कार्यक्रममा प्रदेश सांसद सर्वध्वज साँवाले गत निर्वाचनमा पाँच वटा वडामा सबै सदस्य जित्दा पनि वडाध्यक्ष हार्नुपरेको स्मरण गराउँदै यसपटक त्यस्तो हुन नहुनेमा जोड दिए । कार्यक्रममा एमाले नेताहरु हिमाल सुवेदी, प्रमोद शेर्पा, राम प्रसाद चौलागाँई, चन्द्र भटटराई र विष्णु शर्माले शुभकामना मन्तव्य व्यक्त गरेका थिए ।