इटहरीः इटहरी उपमहानगरपालिका वडा नं. १९ मा दुर्गाप्रसाद पौडेल पुनः वडाध्यक्षको चुनावी प्रतिष्पर्धामा छन् ।

यसपटक इटहरी १९ मा रोचक प्रतिष्पर्धा हुने भएको छ । नेपाली कांग्रेसबाट वडाध्यक्षमा पुनः पौडेल नै वडाध्यक्षको उम्मेदवार छन् भने नेकपा एमालेबाट यसअघिका वडाध्यक्ष समेत रहेका श्रीनारायण चौधरी चुनावी मैदानमा छन् ।

०७४ को स्थानीय निर्वाचनमा चौधरीसँग ४ मतले पराजित भएका पौडेल यसपटक चुनाव जित्ने रणनीतिमा छन् । विभिन्न सामाजिक संस्थामा नेतृत्वदायी भूमिका निर्वाह गरेका पौडेल इटहरी १९ का लोकप्रिय नेताका रूपमा चिनिन्छन् ।

उनले यसअघि नेकपा एमालेको घोषणापत्रमा उल्लेख भएमध्येका ३० प्रतिशत पनि काम नभएको आरोप लगाउँदै यसपटक आफूले चुनाव जित्ने दाबी गरे ।

उनले आफूले चुनाव जितेको अवस्थामा यहाँका गरिब, विपन्न, पीडित र सर्वहारा नागरिकका लागि निःशुल्क अध्यापन गराउने प्रतिवद्वता व्यक्त गरे ।

इटहरी १९ भित्री गाउँ भएकै कारण सबै ठाउँमा बाटो नबनेकाले पनि समस्या निम्तिरहेको समयमा आफूले सडक कालोपत्रेदेखि खानेपानी समस्यालाई निरुपण दिने उनको दाबी छ ।

उनले इटहरी १९ मा बाढीको समस्या रहेकाले शेरा खोलाको तटबन्धनका निम्ति विशेष पहल गर्ने बताए । उनले भवानीपुर सिमसार पार्कदेखि देवीथानसम्म पर्यटकीय क्षेत्रको रूपमा विकास गर्ने प्रतिवद्वता व्यक्त गरे । पौडेलको प्यानलमा खुल्ला सदस्यमा दीपक पुरी, रञ्जित कार्की, महिला वडा सदस्यमा नौमति राई र दलित महिला सदस्यमा कमला दर्जी चुनावी मैदानमा छन् ।