इटहरी: सुनसरीको इटहरी उपमहानगरपालिकामा स्थानीय तह सदस्य निर्वाचनको मतगणनाका क्रममा १८ नम्बर वडाको चार ओटा मतपत्र हराएको छ । सो वडामा कुल दुई हजार ६ सय ५५ मत खसेकोमा चार ओटा मतपत्र हराएपछि गणना स्थगित भएको हो ।

चारवटा मतपेटिकाको १,३१२ मतगणना सकिएपछि बाँकी चारवटा मतपेटिकाको मतगणनाका लागि तयारी हुँदै गर्दा चार ओटा मतपत्र नभेटिएको हो । चारवटा मतपेटिका खोलेर सटिङ गरिँदा १,३४३ मत हुनुपर्नेमा १,३३९ मत मात्रै भेटिएपछि मतगणना स्थगित गरिएको हो ।

इटहरी १८ मा गठबन्धनको तर्फबाट नेकपा माओवादी केन्द्रका राजदेव चौधरी र नेकपा एमालेबाट रामकुमार चौधरी वडाध्यक्ष पदका लागि प्रतिस्पर्धामा छन् । अहिलेसम्मको १,३१२ मतगणना सक्दा वडाध्यक्षमा माओबादी केन्द्रका राजदेवको ३५३ मत प्राप्त भएको छ भने एमालेका रामकुमारको ५८७ मत प्राप्त भएको छ । हालसम्म इटहरीका १ र २० नम्बर वडाको अन्तिम मतपरिणाम आउँदा यहाँ नेपाली कांग्रेसले जितेको छ ।

अहिले इटहरीका २, ४, ५, १७, र १९ नम्बर वडाको मतगणना जारी छ ।