इटहरी । इटहरी उपमहानगरपालिकामा प्रमुख प्रशासकीय अधिकृत लामो समय टिक्न नसक्दा भुक्तानीदेखि विकास निर्माणसम्मका कार्य प्रभावित भएका छन्।

गत फागुन २१ गते नियुक्त भएका हेमराज भुसाल एक महिना नबित्दै काठमाडौं केन्द्रित भएपछि उपमहानगर १५ दिनदेखि हाकिमविहीन बनेको हो। माघ २५ मा उपसचिवबाट सह–सचिवमा बढुवा भएका भुसाल चैत २४ मा काठमाडौं गएको कर्मचारी स्रोतले जनाएको छ।

कर्मचारी श्राेतका अनुसार प्रमुख प्रशासकीय अधिकृत नहुँदा आवश्यक भुक्तानी रोकिएको छ भने विनियोजन भइसकेको रकमसमेत भुक्तानी हुन सकेको छैन। वडाबाट पास भएका योजना कार्यान्वयनमा समस्या भइरहेको सेवाग्राही रोशन राईले बताए।

श्रोतका अनुसार नगर प्रमुख हेमकर्ण पौडेल, उपप्रमुख सङ्गीता चौधरी लगायतसँग तालमेल नमिलेकाले भुसालले इटहरी छोडेका हुन्। कार्य सम्पादन मूल्याङ्कनमा पनि इटहरी पछि परेको र आन्तरिक किचलो बाहिरिएपछि बस्न नमानेकाे जनाइएको छ।भुसालले आफ्नो सरुवा भइसकेकाले उपमहानगर छोडेको र कुनै विवाद नभएको बताएका छन्। ‘सरकारको निर्णय हो, मान्नैपर्छ’, उनले भने।

नगर प्रमुख पौडेलले बाहिर सुनिएजस्तो विवाद नभएको दाबी गर्दै प्रमुख प्रशासकीय अधिकृत जोसुकै आए पनि उत्तम कार्य सम्पादनको अपेक्षा राखेको बताए। उपप्रमुख चौधरीले आर्थिक वर्ष सकिन तीन महिना मात्र बाँकी हुँदा पनि प्रशासकीय अधिकृत नहुँदा आर्थिक, प्रशासनिक तथा विकास कार्यमा चुनौती बढेको बताइन्। नयाँ अधिकृतका लागि पहल भइरहेको जानकारी दिइएको छ। यस अघिका प्रमुख प्रसाशकीय अधिकृत राम चरित्र मेहता करिब ४ वर्ष कार्यकाल सम्हालेर अन्यत्रै सरूवा भएका थिए ।