इटहरीः सुनसरीको इटहरी उपमहानगरपालिकामा मेयर पदमा गठबन्धनबाट प्रतिस्पर्धामा उत्रिएका नेपाली कांग्रेसका नगर सभापति हेमकर्ण पौडेलले इटहरीवासीको दुःखका रुपमा रेहेको डुबानको समस्या आफू निर्वाचित भए सदाका लागि समाप्त पारिदिने बताएका छन् ।

इटहरी ८ मा घर दैलो कार्यक्रममा बोल्दै उनले आफू निर्वाचित भए नगर सकारलाई प्राप्त पहिलो बजेट नै डुबानको समस्या हल गर्नमा खर्च गर्ने उल्लेख गरे । उनले भने “अब बाढी आँउदा छोराछोरी कसरी जोगाउने र ट्याङ्ग्राले ज्यान खान्छ भन्दै रात बिताउनु पर्ने अवस्था काँग्रेस नेतृत्वको इटहरी सरकारले अन्त्य गर्ने छ ।”

घरदैलो अभियानका क्रममा पौडेल दैनिक रुपमा मतदातासमक्ष पुगिरहेका छन् । मतदाताहरुले आफ्नो जित सुनिश्चित रहेको बताएको उनको भनाइ छ । गठबन्धनका तर्फबाट पौडेल मेयर पदका लागि प्रतिस्पर्धामा रहँदा गठबन्धनमै आबद्ध नेकपा एकीकृत समाजवादीका केन्द्रीय सदस्य केशवकुमार बिष्ट उपमेयर पदका प्रत्यासी बनेका छन् । नगरको द्रुततर विकासका लागि गठबन्धनसम्बद्ध सबै उम्मेदवारलाई विजयी गराइदिन उनीहरुले अपिल गरेका छन् ।