इटहरी । सुनसरीको इटहरीबाट प्रहरीले आठ किलो भन्दा बढी यार्सागुम्बासहित दुई जनालाई पक्राउ गरेको छ । बिहीबार दिउँसो कोशी राजमार्गको   इटहरी उपमहानगरपालिका– २० तरहराबाट  ८ किलो दुई सय ग्राम यार्सागुम्बासहित  दुई जनालाई पक्राउ गरेको हो ।

 जिल्ला प्रहरी  कार्यालय सुनसरीका अनुसार पक्राउ पर्नेमा  धरान उपमहानगरपालिका– ३  बस्ने ४२ वर्षीय  छजुङ्ग  भोटे र  धरान १९ का पुष्पराज राई छन् । धरानबाट इटहरी आँउदै गरेको को २ ह १०७ नम्बरको अटोलाई चेकजाँचका क्रममा दुई जनालाई पक्राउ गरेको हो ।

प्रहरीका अनुसार राई अटो चालक हुन् ।  प्रहरीका अनुसार छजुङ्ग भोटे बसेको सिट पछाडीको भागमा रातो रङको स्याउको कार्टुन भित्र लुकाई  राखेको अवस्थामा ८ किलो २५० ग्राम  दुर्लभ बनस्पती यार्सागुम्बा फेला परेको  हो ।

यार्सागुम्बा ओसार पसार गर्न प्रयोग गरेको को २ ह १०७ नम्बरको अटो र यार्सागुम्बासहित पक्राउ परेका दुई जनालाई प्रहरीले  कारवाहीका लागि सव डिभिजन वन कार्यालय तरहरामा बुझाएको छ ।