इटहरीः सुनसरीको इटहरी उपमहानगरपालिकामा स्थानीय तह सदस्य निर्वाचनको मतगणना जारी छ ।

हालसम्म ३६,२०९ मतको गणना सम्पन्न भएको निर्वाचन अधिकृतको कार्यालय इटहरीले जनाएको छ । हालसम्म बाम लोकतान्त्रिक गठबन्धनका तर्फबाट मेयरमा उम्मेदवारी दिएका नेपाली कांग्रेसका नगर सभापति हेमकर्ण पौडेलको अग्रता कायम छ । पौडेलले हालसम्म १६ हजार पाँच सय आठ मत प्राप्त गरेका छन् ।

यो संख्या हालसम्म गणना भएको मतको ४५ प्रतिशत हुन आउँछ । उनका निकटतम प्रतिद्वन्द्वी नेकपा एमालेका उम्मेदवार यामकुमार सुब्बा १३ हजार आठ सय ७९ मतका साथ पौडेललाई पछ्याइरहेका छन् । उपमेयरतर्फ नेकपा एमालेकी उम्मेदवार सङ्गीता चौधरी १५ हजार ६ सय ९३ मतका साथ अग्रस्थानमा रहेकी छन् ।

गठबन्धनका तर्फबाट उम्मेदवार बनेका नेकपा एकीकृत समाजवादीका केन्द्रीय सदस्य केशवकुमार बिष्ट नौ हजार ६ सय ४३ मतका साथ चौधरीलाई पछ्याइरहेका छन् । यस्तै, राप्रपाका मेयर उम्मेदवार आकाश सुब्बाको १,५६५ मत प्राप्त भएको छ भने उपमेयरमा राप्रपाकी वविता चौधरीको २,०८६ मत प्राप्त भएको छ ।

इटहरीमा हालसम्म १, ३, १८, १९ र २० नम्बर वडाको मतगणना सम्पन्न भइसकेको छ । हाल इटहरीको २, ४, ५, ६, १५, १६ र १७ नम्बर वडाको मतगणना भइरहेको निर्वाचन अधिकृतको कार्यालयले जनाएको छ ।