इटहरी । सामाजिक सञ्जालमा एमाले सचिव तथा सांसद योगेश भट्टराईलाई शौचालयमा थुनेर सुरक्षा दिइएको भन्ने चर्चा तीव्र रूपमा फैलिएको छ।

शुक्रबार कञ्चनजंघा हिरक महोत्सव उद्घाटनका लागि गृहजिल्ला ताप्लेजुङ पुगेका सांसद भट्टराईविरुद्ध ‘नो केबलकार’ समूहले विरोध प्रदर्शन गर्दै नाराबाजी गरेका थिए। नाराबाजीपछि भट्टराई शौचालय पस्न पुगेका थिए। स्थानीय स्रोतका अनुसार आन्दोलनकारीबाट सम्भावित असुरक्षा देखेपछि प्रहरीले उनी पसेको शौचालयको ढोकामा चुकुल लगाइदिएको बताइएको छ।

तर, जिल्ला प्रहरी कार्यालय ताप्लेजुङका प्रवक्ता प्रहरी निरीक्षक विवेक बस्नेतले सामाजिक सञ्जालमा फैलिएको जस्तो घटना नभएको स्पष्ट पारे। उनले भने, “त्यस्तो केही पनि होइन, माननीयज्यूलाई पिसाब लागेर आफैं शौचालय जानुभएको हो। त्यसपछि उहाँ सुरक्षित रूपमा काठमाडौं फर्किनुभयो।”

प्रत्यक्षदर्शीका अनुसार प्रहरीले नाराबाजी गरिरहेका प्रदर्शनकारीलाई तितरबितर पार्दै भट्टराईलाई उनी चढ्ने हेलिकोप्टरसम्म सुरक्षा दिनुपरेको थियो।

सांसद भट्टराई संस्कृति, पर्यटन तथा नागरिक उड्ययन मन्त्री बद्रिप्रसाद पाण्डेसँग शुक्रबार हेलिकोप्टरमार्फत फक्ताङलुङ गाउँपालिका–६, लेलेप पुगेका थिए।

ताप्लेजुङको पाथीभरा क्षेत्रमा केबलकार निर्माणको प्रस्तावलाई लिएर विवाद चुलिँदै आएको छ। भट्टराईले केबलकार आवश्यक भएको बताउँदै समर्थन गरेपछि उनी ‘केबलकार विरोधी’ समूहको विरोधको केन्द्र बनेका हुन्।