इटहरीः मोरङको सुन्दरहरैँचा नगरपालिका ६ जुलबी चौकमा कुटपिटबाट एक जनाको मृत्यु भएको छ ।

मृत्यु हुनेमा सोही ठाउँ बस्ने ४० वर्षीय मानबहादुर तामाङ रहेको १ नम्बर प्रदेश प्रहरी कार्यालय विराटनगरले जनाएको छ । कार्यालयका प्रवक्ता प्रहरी उपरीक्षक (एसपी) नवीनराज राईका अनुसार गत चैत ३० गते राति ९ः५० बजे देवीप्रसाद तामाङसँग जग्गाका विषयमा विवाद हुँदा देवीप्रसदका छोरा ३५ वर्षीय मणिकुमार तामाङले चिर्पट प्रहार गर्दा मानबहादुर घाइते भएका थिए ।

घाइते मानबहादुरलाई उपचारार्थ न्युरो अस्पताल विराटनगर लगिएकोमा उपचारका क्रममा उनको हिजो शुक्रबार बिहान ९ः४४ बजे मृत्यु भएको हो । घाइते मानबहादुरको चोटकै कारण मृत्यु भएपछि कुटपिटमा संलग्न मणिकुमारलाई पक्राउ गरी कर्तव्य ज्यान मुद्दामा कारबाहीका लागि इलाका प्रहरी कार्यालय बेलबारीको हिरासतमा राखी अनुसन्धान अगाडि बढाइएको प्रहरीले जनाएको छ ।