इटहरीः सुनसरीको इटहरी उपमहानगरपालिका २ स्थित नवजागृति टोलमा गएराति सुतली बम विस्फोट हुँदा दुई जना घाइते भएका छन् ।

घाइते हुनेहरुमा सोही ठाउँ डेरा गरी बस्ने २२ वर्षीय रबिन थापा र लमजुङ ५ ढोडेनीका २३ वर्षीय शेरजंग गुरुङ रहेको इलाका प्रहरी कार्यालय इटहरीले जनाएको छ । कार्यालयका प्रमुख प्रहरी नायबउपरीक्षक (डीएसपी) खगेन्द्रकुमार खड्काका अनुसार थापाको डेराभित्रै गएराति १०ः३० बजे बम विस्फोट भएको थियो । विस्फोटमा परी घाइते भएका थापाको विराटनरस्थित आँखा अस्पताल र अर्का घाइते गुरुङको धरानस्थित बीपी कोइराला स्वास्थ्य विज्ञान प्रतिष्ठानमा उपचार भइरहेको उनको भनाइ छ ।

घटनास्थलबाट कङग्रेन्ट फ्रन्ट अफ नेपालको पर्चा बरामद भएको डीएसपी खड्काले बताए । पर्चामा पूर्वाञ्चल डिभिजन प्रमुख बृज किशोर ठाकुरको हस्ताक्षर छ । अमित श्रेष्ठको घरमा डेरा गरि बस्दै आएका थापाको कोठामा गुरुङ २५ दिनदेखि बस्दै आएको स्थानीय बताउँछन् । घटनाबारे विस्तृत अनुसन्धान सुरु गरिएको प्रहरीले जनाएको छ ।