इटहरीः नेकपा एमालेनिकट पत्रकारहरुको संगठन प्रेस चौतारी नेपालको २४ औँ स्थापना दिवस सुनसरीमा पनि विविध कार्यक्रम गरी मनाइएको छ ।

दिवसका अवसरमा चौतारीको जिल्ला शाखाले धरानमा आयोजना गरेको कार्यक्रमका क्रममा लामो समयदेखि पत्रपत्रिका वितरणमा सक्रिय रहेका दुई जना वितरकहरु कल्याण राई र बद्री राईलाई साइकल प्रदान गरिएको थियो । सूचना सम्प्रेषणको महत्वपूर्ण माध्यमका रुपमा स्थापित रहेको पत्रिकाको पहुँच विस्तारमा योगदान गरेबापत दुवै वितरकहरुलाई सम्मानस्वरुप साइकल प्रदान गरिएको चौतारीकी सुनसरी जिल्ला अध्यक्ष शुभद्रा प्याकुरेलले बताइन् ।

एमालेका संघीय महासचिव शंकर पोख्रेलको प्रमुख आतिथ्यमा सम्पन्न कार्यक्रममा पार्टीका स्थायी कमिटी सदस्य देवराज घिमिरे, पार्टीका केन्द्रीय सदस्यहरु, नेपाल पत्रकार महासंघ सुनसरीका अध्यक्ष जनकऋषि राई लगायतका व्यक्तित्वहरुको उपस्थिति रहेको थियो ।