इटहरीः झापाको गौरादह ९ को दुधे बैगुन्धुरा भित्री सडकखण्डअन्तर्गत कमल खोलामा पुल निर्माणका लागि राखिएका सामग्री चोर्न आएका एक पटके कसुरदारलाई पहरीले पक्राउ गरेको छ ।

पक्राउ पर्नेमा ४० वर्षका रतन साह रहेको १ नम्बर प्रदेश प्रहरी कार्यालय विराटनगरले जनाएको छ । कार्यालयका प्रवक्ता प्रहरी उपरीक्षक (एसपी) नवीनराज राईका अनुसार निर्माणस्थलबाट छडलगायत विभिन्न निर्माण सामग्री चोरिरहेको अवस्थामा अभियुक्त साहलाई प्रहरीले चोरीमा प्रयोग भएको ट्याक्टरसहित पक्राउ गरेको हो ।

साह मे १ त ४७२८ नम्बरको ट्याक्टरसहित गएराति पक्राउ परेका हुन् । अन्य तीन जना भने फरार रहेको एसपी राईको भनाइ छ । यो समूहले दुई दिनअगाडि पनि ४० थान छड लगेको प्रहरीसमक्ष स्वीकार गरेको बताउँदै प्रहरीले फरार अभियुक्तहरुको खोजी तिव्र पारिएको जनाएको छ ।