इटहरी । समाजवादी मोर्चाको बैठक नेकपा एकीकृत समाजवादीको केन्द्रीय कार्यालय आलोकनगरमा बसिरहेको छ । यही १५ गते काठमाडौंमा हुन लागेको विरोध सभाको तयारीका लागि बैठक बसेको मोर्चाका नेता गंगानारायण श्रेष्ठले जानकारी दिए । यसअघि चैत २४ गते जनकपुरमा गर्ने भनिएको विरोध सभा स्थगित भएको छ । मोर्चाले भोलि बिहान बौद्धिक वर्गसँग अन्तरक्रियाको कार्यक्रम राखेको छ ।

फागुन २७ गते बसेको मोर्चाको बैठकले केपी शर्मा ओली नेतृत्वको गठबन्धन सरकारका कारण सडकमा राजावादी शक्तिहरू सल्बलाएको निष्कर्ष निकाल्दै प्रतिगामी शक्तिलाई केन्द्रबाट चुनौती दिन विरोधसभाको कार्यक्रम राखिएको जनाएको थियो । बैठकमा एकीकृत समाजवादीका अध्यक्ष माधवकुमार नेपाल भने उपस्थित छैनन् ।

बैठकमा माओवादीको तर्फबाट अध्यक्ष पुष्पकमल दाहाल ‘प्रचण्ड’, वरिष्ठ उपाध्यक्ष नारायणकाजी श्रेष्ठ र महासचिव देव गुरुङ सहभागी छन् । एकीकृत समाजवादीबाट वरिष्ठ नेता प्रमेश हमाल, महासचिव घनश्याम भुसाल सहभागी छन् । यस्तै नेकपाको तर्फबाट महासचिव नेत्रविक्रम चन्द सहभागी छन् । यसैबीच, मोर्चा घटक नेकपा एकीकृत समाजवादीले आज आन्दोलनका कार्यक्रम सार्वजनिक गर्ने भएको छ ।

सरकार सुशासन कायम गर्न असफल भएको र पुनरुत्थानवादीहरु सल्बलाएको भन्दै त्यसविरुद्ध समाजवादीले आन्दोलन गर्न लागेको हो । आज दिउँसो १२ बजे पत्रकार सम्मेलन गरी आन्दोलनका कार्यक्रमहरु सार्वजनिक गरिने केन्द्रीय आन्दोलन संयोजन कमिटीका सचिव जीवनराम श्रेष्ठले जानकारी दिए । फागुन २५ गते त्रिभुवन अन्तर्राष्ट्रिय विमानस्थलमा पूर्वराजा ज्ञानेन्द्र शाहको स्वागतमा देखिएको भिडपछि अहिले विपक्षी मोर्चा पनि आफ्नो शक्ति प्रदर्शनका तयारीमा रहेको छ ।