इटहरी । वराहक्षेत्र नगरपालिका क्षेत्रबाट सशस्त्र प्रहरीले ठूलो मात्रामा अवैध लागूऔषध गाँजा बरामद गरेको छ। सशस्त्र प्रहरी उपरीक्षक समेनन्द बज्राचार्यका अनुसार वराहक्षेत्र नगरपालिका-१ को पटनाली खोलाबाट ९७ केजी गाँजा बरामद गरिएको हो।

सशस्त्र प्रहरीको गस्ती टोलीले पटनाली खोलाको उत्तरतर्फबाट दक्षिणतर्फ चतरा-धरान सडक खण्डतर्फ जाँदै गरेका अपरिचित व्यक्तिहरूले बोकेको झोलाबाट उक्त गाँजा फेला पारेको हो। सशस्त्र प्रहरी बल नेपाल सुरक्षा बेस चतराको टोलीले गाँजा बरामद गरेपछि गाँजा बोक्ने व्यक्ति भने फरार भएका छन्।

सशस्त्र प्रहरीले गाँजा बरामद गरी नेपाल प्रहरीलाई बुझाउने प्रक्रिया सुरु गरेको छ। बरामद गरिएको गाँजा प्रतिबन्धित लागूऔषधको सूचीमा पर्ने वनस्पति जस्तो देखिएको प्रहरीको प्रारम्भिक रिपोर्टमा उल्लेख छ। फरार व्यक्तिको पहिचान र पक्राउका लागि अनुसन्धान जारी रहेको सशस्त्र प्रहरी उपरीक्षक बज्राचार्यले जानकारी दिनुभएको छ।