इलाम । व्यवस्था फेरिएसंगै इलाम अस्पतालको अवस्था फेरिने धेरैको अपेक्षा थियो । तर, इलाम अस्पतालको अवस्था नफेरिँँदा त्यस क्षेत्रका नागरिक स्वास्थ्य उपचारका लागि जिल्ला छाड्न बाध्य छन् ।

इलाम जिल्ला अस्पतालको भवनको बाहिरी बनावट देख्दा यो अस्पतालमा निक्कै गुणस्तरीय सेवा पाइएला भन्ने जो कोहीलाई लाग्न सक्छ । तर, अस्पतालमा दक्ष जनशक्ति, अस्पतालमा प्रयोग हुने उपकरण नहुँदा सेवाग्राहीलाई गुणस्तरीय सेवा प्रवाह हुन नसकेको हो । यो अस्पतालमा बिरामीको चाप उच्च छ । भाइरल ज्वरो र सामान्य रुघाखोकीका बिरामी समेत रेफर गरेर तराईका अस्पतालमा लानुपर्ने बाध्यता रहेको छ ।

झापाका महंगा अस्पताल र बिराटनगर एवम् काठमाडौसम्म विरामीलाई लैजानुपर्ने हुन्छ । अस्पतालमा पर्याप्त मात्रामा बेड नहुँदा इमरजेन्सीमा आएका बिरामीलाई समेत बेड अभावमा भुईँमै राखेर उपचार गरिँदै आएको छ । बिरामीको चाप बढ्दा बेडको अभाव एकातिर छ भने अर्कोतर्फ इमरजेन्सी वार्डमा ३/४ जना स्वास्थ्यकर्मीले उपचार सेवा दिनुपर्ने बाध्यता छ ।

इमरजेन्सीमा आठ/नौ वटा मात्र बेड छन् । तर, दैनिक ७०/८० जना बिरामीहरु इमरजेन्सीमा भर्ना हुँदा बेड अभावले भुइँमै राखेर उपचार गर्न बाध्य भइरहेको इमरेजेन्सी शाखाका इञ्चार्ज टीका लुइँटेलको भनाइ छ ।

अस्पतालमा जनशक्तिको अभाव यो पहिलोपटक होइन । यहाँ शुरुदेखि नै जनशक्तिको अभाव छ । बिरामीको चाप बढ्दा पनि सीमित जनशक्तिले नै सेवा प्रवाह गरिरहनु परेको छ । जनशक्ति अभावकै कारण बिरामीले समयमा उपचार पाउन नसकेको गुनासो गरिरहेका छन् । अस्पतालमा डेंगूका मात्रै दैनिक ५०/६० जना बिरामीहरु भेटिने गरेको अस्पतालका मेडिकल सुपरिटेन्डेट डाक्टर प्रभु साहको भनाइ छ ।

बिरामीले स्वास्थ्य सेवा लिन घण्टौ लाइनमा बस्नुपर्ने बाध्यता छ । यस अस्पतालमा नौजना विशेषज्ञसहित १६ डाक्टरको दरबन्दी रहेकोमा हाल एक जना मात्र विशेषज्ञ डाक्टर दरबन्दीमा कार्यरत छन् । बाँकी करार र छात्रवृत्तिका डाक्टरले काम गरिरहेका छन् । अस्पतालको ओपीडीमा पनि दैनिक ३/४ सय जनासम्म बिरामी आउने गरेका छन् ।

अस्पतालमा बिरामीको चाप बढी रहेपछि उपचार गर्न आउनेलाई स्वास्थ्यकर्मीले २४सै घण्टा खटेर सेवा प्रबाह गरिरहेका छन् । जटिल अवस्थाका बिरामी बाहेक अन्य बिरामीलाई जिल्ला बाहिरका अस्पतालमा रेफर भने अस्पतालले नगरेको जनाएको छ । तर, स्क्रब टाइफस लगायतका बिरामीको उपचार इलाममा सम्भव छैन ।

जिल्लाका राजनीतिक दल र नेताले हरेक चुनावमा मुख्य चुनावी एजेण्डा नै इलाम अस्पतालको सेवा बिस्तार भनेर गर्ने गरेका छन् । तर, चुनाव धेरैपटक भयो यहाँको अवस्था सुधार भएन ।