डडेल्धुरा । डडेल्धुरा भागेश्वर गाउँपालिकाकी एक २० वर्षीया महिलामाथि सामुहिक बलात्कार गरेको आरोपमा प्रहरीले चार जनालाई पक्राउ गरेको छ ।

सामुहिक बलात्कार गर्ने चार जनालाई प्रहरीले पक्राउ गरेर बिहीबार डडेल्धुरा जिल्ला प्रहरी कार्यालयमा सार्वजनिक गरेको हो । सामूहिक बलात्कारमा परेर युवतीको पाँच महिनाको गर्भ समेत रहेको खुलेको छ । पक्राउ पर्नेमा डडेल्धुरा भागेश्वर गाउँपालिका वडा नं–३ निवासी २३ वर्षीय कमल ओड, २२ वर्षीय तपेन्द्र ओड, २८ वर्षीय दिपक ओड र १८ वर्षीय प्रकाश ओड रहेको डडेल्धुराका प्रहरी नायव उपरीक्षक दिपक कार्कीले जानकारी दिए ।

प्रहरीले मंगलबार पक्राउ परेका ४ जनालाई बिहीबार जिल्ला अदालत डडेल्धुराबाट ७ दिनको म्याद थप गरेर सार्वजनिक गरेको हो। युवतीलाई सामूहिक बलात्कार गरेको घटनामा अन्य व्यक्तीको पनि संलग्नता हुनसक्ने विषयमा अनुसन्धान भइरहेको उनले बताए ।
गत वैशाख ५ गते दिउँसो भागेश्वर गाउँपालिकाको बाटो छेउमा रहेको नानिगाड खोलामा दिउँसो र वैशाख १२ गते साँझ एउटा बाँझो (मान्छे नबस्ने) घरको गोठमा लगेर सामुहिक बलात्कार गरिएको प्रारम्भिक अनुसन्धानबाट देखिएको प्रहरीले जनाएको छ ।
डडेल्धुरा भागेश्वर गाउँपालिकाका २० वर्षीय युवती स्थानीय लामिकांडे स्वास्थ्य चौकीमा सञ्चालन भएको स्वास्थ्य शिविरमा उपचार गर्न भदौ ३० गते पुगेकी थिइन् । पेटसम्बन्धी समस्या भएकाले उपचार गर्न आएकी उनको भिडिओ एक्स–रे गर्दा पेटमा पाँच महिनाको गर्भ रहेको पाइयो ।

विवाहित ती युवतीको पति एक वर्ष भन्दा बढी समयदेखि मजदुरी गर्न भारतमा थिए । पेटमा गर्भ रहेको पाइएपछि परिवारका मान्छेले सोधी खोजी गर्दा पीडित युवतीले सामुहिक बलात्कारमा परेको घटना सुनाएकी थिइन् । ‘पीडित युवतीले सामुहिक बलात्कार गर्नेमध्ये एक जनाको हात र घाँटीमा ट्याटु रहेको हुलिया बताइन् । उनले दिएको हुलियाका आधारमा एक जनालाई पक्राउ गर्‍यौँ, आरोपित युवाले घटना स्वीकारे, उनीबाट थप अरूको जानकारी लिएर मंगलबार ४ जना पक्राउ गरेर ल्यायौँ’ डिएसपी कार्कीले भने, ‘घटनाको बारेमा थप अनुसन्धान गरिरहेका छौं’।

पीडित युवतीका ससुराले मंगलबार नै बुहारीमाथि सामुहिक बलात्कार गरेको भन्दै जिल्ला प्रहरी कार्यालय डडेल्धुरामा किटानी उजुरी दर्ता गराएका थिए । पीडित युवतीको डेढ वर्षको एक छोरी पनि रहेको उनले जानकारी दिएका छन् ।