इटहरी/ नयाँ घर बनाउँदा इटहरी उप-महानगरपालिकाले आफैले नक्सा बनाइदिने भएको छ। भवन निर्माण आचारसंहिता अनुसारका घर बनाउन सघाउने गरी उप-महानगरपालिकाले आफैले नक्सा बनाइदिने तयारी गरेको हो।

इटहरी उपमहनगरपालिका मेयर हेमकर्ण पौडेलले स्थानीयले भवनको नक्सा बनाउँदा चर्को शुल्क तिर्नुपरेको गुनासो आएकाले उप-महानगरपालिकाले सहजीकरण गर्न लागेको बताउनुभयो। “निवेदन दिएपछि नक्सा उप-महानगरपालिकाले नै बनाइदिन्छ” उहाँले भन्नुभयो, सेवाग्राहीले साउन १ गतेदेखि यो सेवा लिन पाउनेछन्।”

भूकम्पप्रतिरोधी घर निर्माणमा स्थानीयलाई जागरुक बनाउन उप-महानगरपालिकाले नै चाहे अनुसारको नक्सा बनाइदिन लागेको मेयर पौडेल बताउनुहुन्छ। “प्राइभेट इन्जिनियरिङ कन्सल्टेन्सीमार्फत घरको डिजाइन बनाउँदा धेरै महँगो पर्यो भन्ने गुनासो आएको छ”, उहाँले भन्नुभयो, “सहुलियत दरमा अब उप-महानगरपालिकाले नै नक्सा बनाउँछ।”

कन्सल्टेन्सीले घरधनीबाट लिने जथाभावी शुल्क, समयमा उप-महानगरपालिकामा दर्ता नगर्ने जस्ता समस्याले आफैले नक्सा बनाउने काम शुरु गर्न लागेको हो। जनताले थोरै शुल्कमा नक्सा बनाउन भन्ने हाम्रो उदेश्य हो मेयर पौडेल भन्नुहुन्छ।