इटहरी । विराटनगरको मुख्य राजमार्ग र बजार क्षेत्रको ट्राफिक व्यवस्थापनको लागि आठ ठाउँमा ट्राफिक लाइट जडान गरिने भएको छ ।ट्राफिक व्यवस्थापनलाई सहज बनाउने उद्देश्यका साथ विराटनगरका मुख्य राजमार्ग र बजार क्षेत्रका आठ ठाउँमा ट्राफिक लाइट जडान गरिने भएको हो । 

रोडशेष चौकदेखि राजवंशी चौकसम्मको क्षेत्रमा पाँच ठाउँमा ट्राफिक लाइट जडान गर्ने प्रक्रिया अघि बढेको जिल्ला ट्राफिक प्रहरी कार्यालय मोरङका प्रमुख प्रहरी निरीक्षक राजकुमार कार्कीले जानकारी दिए । ती स्थानमा ६ लेन सडक आयोजना इटहरीले ट्राफिक लाइट जडानको प्रक्रिया अघि बढाएको हो ।

यस्तै बजार क्षेत्रको ट्राफिक चौकदेखि तीनपैनीसम्म तीन ठाउँमा विराटनगर महानगरपालिकाले ट्राफिक लाइट जडान गर्ने तयारी गरेको छ । ६ लेन सडक आयोजनाले मुख्य राजमार्गअन्तर्गत रोडशेष, घाँसचौक, बरगाछी, कञ्चनबारी र राजवंशी चौकमा ट्राफिक लाइट जडान हुनेछ । यस्तै महानगरले जलजला चौक, तीनपैनी र अर्काे ट्राफिक चौक वा अस्पताल चौकमा ट्राफिक लाइट जडान गर्ने तयारी गरिरहेको छ । तत्कालको आवश्यकता ट्राफिक चौक भएकाले यसलाई प्राथमिकतामा राख्नुपर्ने माग गरिएको ट्राफिक प्रमुख कार्कीले बताए ।