इटहरी । केन्द्रीय नेतृत्वले भागवण्डा गर्दा प्रदेश १ मा मुख्यमन्त्री पूर्ण कार्यकाल एमालेलाई दिने सहमति गरेपछि नेकपा माओवादी केन्द्र तत्काल सरकारमा सहभागि नहुने भएको छ । केन्द्रको सहमतिप्रति असन्तुष्टि जनाउँदै माओवादी सरकारमा सहभागि नहुने भएको हो । 

सरकारमा सहभागिताका लागि माओवादी केन्द्रले  निर्णय पुनरावलोकन हुनुपर्ने माग गरेको छ ।  माओवादी केन्द्र प्रदेश १ संसदीय दलका नेता इन्द्रबहादुर आङ्बाले निर्णय पुनरावलोकन नभएसम्म सरकारमा सहभागि नहुने बताए । उनले प्रदेशमा आधा– आधा कार्यकाल मुख्यमन्त्री बाडिनुपर्ने बताए । 

एमाले र माओवादी दुबै दलका शीर्ष नेताले प्रदेश सरकारमा आलोपालो हुने बताएका थिए । आङ्बो पनि मुख्यमन्त्रीमा आलोपालो हुने बताउँदै आएका थिए । तर आइतबार साझ सत्तारुढ गठबन्धनको बैठकले प्रदेश १ मा पाँच वर्ष नै एमालेलाई दिने सहमति गरेको थियो ।

एमाले प्रदेश १ संसदीय दलका नेता हिक्मतकुमार कार्की आइतबार मुख्यमन्त्री नियुक्त भएका थिए । आज उनको सपथग्रहण छ । आज उनले सानो आकारको मन्त्रीमण्डल पनि विस्तार गर्ने तयारी छ । सरकारलाई दिएको समर्थन भने यथावत रहने आङ्बोले बताए ।