इटहरी । धरान उपमहानगरपालिका–१३ की ४२ वर्षीय एकल महिला उषा राईको हत्यामा संलग्न चार जना अभियुक्तलाई प्रहरीले पक्राउ गरेको छ । इलाका प्रहरी कार्यालय धरानले मंगलबार पत्रकार सम्मेलनमार्फत अभियुक्तहरूलाई सार्वजनिक गरेको हो । प्रहरीले हत्यामा संलग्न अभियुक्त धरान–१३ की ५५ वर्षीया उर्मिला राई, २६ वर्षीया सुमित्रा राई, धरान–१७ की २९ वर्षीय सुसेली राई र ४० वर्षीय रत्न लिम्बु सुब्बालाई पक्राउ गरेर सार्वजनिक गरेको हो । 

हत्यामा संलग्न मुख्य अभियुक्त उर्मिलाले आफ्ना श्रीमान् गोविन्द्र राईसँग उषाको सम्बन्ध रहेको भन्दै स्थानीय जनजागृती आमा समुहका सदस्यहरूलाई बोलाएर कुटपिट गर्दा उषा गम्भिर घाइते भएकी थिइन् । उनको उपचारका क्रममा मंसिर १३ गते मृत्यु भएको थियो । उषाको परिवारले हत्यामा संलग्न स्थानीय सिर्जना राई, निरकुमारी गुरुङ, मिना राई लगायतका नाममा किटानी जाहेरी दिएपनि प्रहरीले पक्राउ गर्न सकेको छैन । 

इलाका प्रहरी कार्यालय धरानका डीएसपी बुद्ध श्रेष्ठ का अनुसार अभियुक्तहरूको पहिचान भइसकेकाले पक्राउ गर्न प्रहरी परिचालन गरिएको छ ।हत्यामा संलग्न चार जनालाई पक्राउ गरेपछि आफन्तले उषाको शव पोष्टमार्टम पछि दाहसंस्कार गरेका छन् । उषाकी छोरी स्मृति राईले आमाको हत्यामा संलग्न सबैलाई पक्राउ गरी कडा कारबाही गर्न माग गरेकी छिन ।