इटहरी । मोरङ क्षेत्र नम्बर ३ (१) को प्रदेशसभामा नेपाली कांग्रेसले मानबहादुर लिम्बुलाई टिकट दिएको छ।बेलबारी नगरपालिका-८ निवासी लिम्बूले बिहीबारै निर्वाचन अधिकृतको कार्यालयमा उम्मेदवारी दर्ता गरेका छन्। लिम्बू   कांग्रेस केन्द्रीय महाधिवेशन प्रतिनिधि एवम् नेविसंघ मोरङका पूर्व सभापति पनि हुन्। 

उक्त क्षेत्रबाट चुनावी मैदानमा रहेका शेखरचन्द्र थापाको डेंगु र निमोनियाका कारण बुधबार निधन भएको थियो। प्रदेश १ का वन, वातावरण तथा भू–संरक्षणमन्त्री थापाको निधनपछि निर्वाचन आयोगले मंसिर ४ मै निर्वाचन गर्ने गरी कांग्रेसलाई नयाँ उम्मेदवारको मनोनयन समय बिहीबारका लागि दिएको थियो। 

लिम्बूले बेलबारीस्थित निर्वाचन कार्यालयमा पुगेर मनोनयन दर्ता गराइसकेका छन्। उम्मेदवारी परेपछि अब उनी र एमालेका दिलीप राईबीच प्रदेशसभाका लागि भिडन्त हुने भएको छ।