बिराटनगर । निर्वाचन आयोगले मोरङ निर्वाचन क्षेत्र नम्बर– ३ को प्रदेशसभा ‘१’ का लागि छुट्टै निर्वाचन कार्यक्रम सार्वजनिक गरेको छ । सो क्षेत्रका नेपाली कांग्रेसबाट प्रदेशसभा सदस्य उम्मेदवार शेखरचन्द्र थापाको मृत्यु भएपछि आयोगले  सम्बन्धित दलका लागि निर्वाचन कार्यक्रम संसोधन गरेको हो ।

संसोधन अनुसार उम्मेदवारी दर्ता, दाबी विरोध र अन्तिम नामावली प्रकाशनका लागि बिहीबार र शुक्रबारका लागि समय तोकिएको छ । मतदान भने मंसिर ४ का लागि नै निर्धारण गरिएको छ ।

प्रदेश १ निर्वाचन कार्यालय विराटनगरका प्रमुख लेवन काश्यप अधिकारीका अनुसार उम्मेदवारी मनोनयन दर्ताका लागि बिहीबार विहान १० बजेदेखि १ बजेसम्मका लागि समय तोकिएको छ । १ बजेदेखि २ बजेसम्म उम्मेदवारको सूची प्रकाशन, दिउँसो २ बजेदेखि ५ बजेसम्म उम्मेदवार विरुद्ध उजुरीका लागि समय तोकिएको छ । जाँचबुझका लागि कात्तिक २४देखि ५ बजेदेखि २५ गते दिउँसो १२ सम्म समय तोकिएको छ ।  नाम फिर्ता लिने, अन्तिम नामावली प्रकाशन गर्ने र निर्वाचन चिन्ह प्रदान गर्ने समय शुक्रबारलाई तोकिएको छ ।  

प्रदेशसभा निर्वाचन ऐन २०७४ को ३२ को उपदफा  ५ अनुसार जुन दलको  उम्मेदवारको मृत्यु भएको हो, सोही दलका लागि मात्रै निर्वाचन आयोगले निर्वाचनको केही कार्यक्रम  संसोधन गरी सार्वजनिक गरेको हो ।

गत असोेज २३ गते मनोनयन दर्ता गरेका थापा २४ गतेदेखि अस्पताल भर्ना भएका थापाको आज विहान मृत्यु भएको थियो । प्रदेश १ का वन वातावरण तथा भू संरक्षण मन्त्री समेत रहेका थापाको मृत्यु शोकमा प्रदेश १ सरकारले बिहीबार प्रदेश १ मा सार्वजनिक विदा दिएको छ ।