इटहरी । सिरहाबाट अपहरणमा परेका १८ वर्षीय युवकका शुक्रबार विराटनगरमा हत्या गरिएको अवस्थामा शव फेला परेको छ ।सिरहाको गोलबजार घर भएका १८ वर्षीय अंशु सदाको शव विराटनगर बसपार्कमा रहेको अप्सरा गेष्टहाउसभित्र भेटिएको हो ।

उनको हत्यामा संलग्न भएको आरोपमा प्रहरीले तीन जनालाई पक्राउ गरेको छ । पक्राउ पर्नेमा मोरङको रतुवामाई नगरपालिका–५ का २६ वर्षीय मनोज कार्की, १९ वर्षीय विष्णु भनिने प्रशान्त मण्डल र धनुषाको कमला नगरपालिका–६ का राकेश ठाकुर छन् ।उनीहरुमाथि थप अनुसन्धान भईरहेको एक जिल्ला प्रहरी कार्यालय मोरङले जनाएको छ ।

प्रारम्भिक अनुसन्धानका क्रममा  समयमा नै सूचना नआएका कारण घटना भएको प्रहरीले निष्कर्ष निकालेको छ । सदाको परिवारले अपहरण भएकोे तीन दिनपछि बिहीबार  इलाका प्रहरी  कार्यालय गोलबजारमा निवेदन दिएका थिए । प्रहरीमा उजुरी गरेपछि अंशुको परिवारले फिरौती मागेको मध्येबाट तत्कालका लागि भन्दै १० हजार रुपैयाँ मनोज कार्कीको माछापुच्छ्रे बैंकको खातामा हालिदिएका थिए । 

शुक्रबार बिहान कार्की र मण्डल पैसा निकाल्न बैंकमा पुगे । अपहरणको सूचनापछि निगरानी बढाएको प्रहरीले पैसा निकाल्दै गर्दा बैंकबाटै दुई जनालाई पक्राउ गर्यो ।  पक्राउ परेकाहरुले शव भए ठाउसम्म पुर्याए ।

‘पक्राउ परेकाहरुलाई हामीले सोधपुछ गर्दा अपहरणपछि हत्या गरिसकेको बयान दिए,’ मोरङका एसपी शान्तिराज कोइरालाले भने,‘ होटलमा पुगेर अनुसन्धान गर्दा शव भेटियो ।’घटनामा  सङ्लग्न एक जना अझै फरार छन् । एसपी  कोइरालाले घटनाको थप अनुसन्धान भइरहेको बताए ।