विर्तामोड । नेपाली कांग्रेसका महामन्त्री विश्वप्रकाश शर्माले आगामी निर्वाचनमा झापा क्षेत्र नं. १ बाट उम्मेदवार भई बिजयी हुने बताएका छन् ।
झापाको विर्तामोडमा सोमबार आयोजित एक कार्यक्रममका शर्माले अघिल्ला दुई निर्वाचनमा पराजित भएको भएपनि यसपटक आफ्नो पक्षमा माहोल बनेको दावी गरे ।

शर्मा २०७० र २०७४ को निर्वाचनमा झापा १ बाट पराजित भएका थिए । २०७० सालको निर्वाचनमा नेकपा एमालेका नेता रविन कोइरालासँग ६८९ मत अन्तरले पराजित भएका उनी २०७४ सालको निर्वाचनमा नेकपा माओवादी केन्द्रका नेता राम कार्कीसँग २ हजार ८६३ मतअन्तरले पराजित भएका थिए ।

सत्तारुढ गठबन्धनबीच यसअघिको निर्वाचनमा चुनाब जितेका क्षेत्रमा सम्बन्धित दलको नै उम्मेदवार हुनेगरि भागबण्डा हुने चर्चा चलिरहेको बेला शर्माले गठबन्धन दलको तर्फबाट झापा १ मा उम्मेद्वार बन्न चाहेको बताएका हुन् । अघिल्लो निर्वाचनमा जुन पार्टी जहाँबाट जितेको थियो, सोही ठाउँमा त्यही पार्टीका उम्मेदवारलाई यसपटक टिकट दिने गठबन्धन दलबीच मापदण्ड बनेकाले आफूले टिकट पाइहाल्ने निश्चित भइनसकेको शर्माले बताए । निर्वाचनमा उम्मेदवार बन्न पाएको अवस्थामा भने झापा १ मै उम्मेदवार बन्ने उनको भनाइ छ ।

दुई पटकको ट्रायलमा सफल हुन नसकेको भएपनि तेस्रो पटकको ट्रायल पास गर्ने उनको विश्वास छ । ‘काट्नेले तीन पटकमा अवश्य राँगो छिनाउँछ भन्ने छ’ उनले भने, ‘तीन पटकमा आफू पनि कसो नजितिएला र ?’ पार्टीभित्र प्रवक्ता अनि त्यसपछि महामन्त्रीको जिम्मेवारी थप्दैगर्दा निर्वाचनमा पटक–पटक हार्नु आफ्नो लागि राम्रो नभएको उनले बताए ।

वीरता मिडिया हाउसले आयोजना गरेको कार्यक्रममा नेपाली कांग्रेसका जिल्ला सचिव कृष्ण हुमागाई, नेकपा एमालेका जिल्ला सदस्य देवराज कार्की, नेपाल प्रेस युनियनका पूर्व केन्द्रीय सदस्य गोविन्दचन्द क्षेत्रीलगायतले शुभकामना मन्तव्य राखेका थिए । कार्यक्रममा पत्रकारहरु नकुलकाजी पाण्डे, राजबाबु शंकर र भारती राईलाई पुरस्कृत गरिएको थियो ।