इटहरी । सुनसरीको धरान उपमहानगरपालिका–८ मा घाँटी काटिएको अवस्थामा एक जना पुरुषको शव फेला परेको छ । घाँटीको अगाडिको भाग खुकुरीले काटिएको अवस्थामा धरान–१३ का ४१ वर्षीय रामबहादुर रम्तेलको शव फेला परेको इलाका प्रहरी कार्यालय धरानका डिएसपी बुद्ध श्रेष्ठले जानकारी दिए । उनका अनुसार घटना बिहीबार साँझ ५ः३० बजेतिरको छ ।

मृत फेला परेका रम्तेलकी सासू ७१ वर्षीया नरमाया भुजेल टाउकोमा खुकुरीले काटिएको अवस्थामा भेटिएकी छन् । गम्भीर घाइते नरमायालाई उपचारका लागि विराटनगरको विराट नर्सिङ होम एवम् विराटनगर अस्पताल ल्याइएको छ । डिएसपी श्रेष्ठका अनुसार सासूलाई खुकुरीले प्रहार गरेपछि रम्तेल आफूले घाँटी काटेर आत्महत्या गरेको प्रारम्भिक अनुसन्धानबाट खुलेको छ । ‘घरको बरन्डाको कोठामा घाँटी काटिएको अवस्थामा ज्वाईंको शव फेला परेको थियो ।

त्यही कोठामा टाउको काटिएको र देब्रेतर्फको भागमा गहिरो चोट लागेको गम्भीर घाइते अवस्थामा सासू भेटिएकी हुन्,’ उनले भने, ‘प्रहरी पुग्दा कोठा रगतले लतपतिएको अवस्थामा थियो । पारिवारिक विवादका कारण घटना भएको हुनसक्ने अनुमान गरिएको छ ।’ नरमायाकी छोरी भने वैदेशिक रोजगारीमा गएको पाइएको उनको भनाइ छ । घटनास्थलबाट प्रहरीले एउटा खुकुरी तथा रगत लतपतिएका कपडा बरामद गरेको छ । डिएसपी श्रेष्ठले घटनाका बारेमा अनुसन्धान सुरु गरिएको जानकारी दिए ।