इटहरी ।  लिम्बुवान राज्य घोषणाका लागि दबाब दिन आज (आइतबार) लिम्बुवान बन्दको आह्वान गरिएको छ । बन्दको ताप्लेजुङ र पाँचथरमा सामान्य प्रभाव परेको छ । अन्य जिल्लामा प्रभाव शून्य छ । प्रदेश १ प्रहरी कार्यालय विराटनगरका अनुसार ताप्लेजुङ र पाँचथरबाट लामो दूरीका सवारीसाधन सञ्चालन भएनन् । यी दुई जिल्लामा पनि छोटो दूरीका सवारीसाधन भने चलिरहेका छन् । बजार, पसल खुला छन् । 

अन्य जिल्लामा बन्दको प्रभाव परेको छैन । यातायात, बजार, उद्योग कलकारखाना निर्वाध रूपले चलिरहेको प्रदेश १ प्रहरी प्रवक्ता एसपी नवीनराज राईले जानकारी दिए । उनका अनुसार बन्दको पूर्वघोषित कार्यक्रम रहेकाले सबै ठाउँको सुरक्षा व्यवस्था कडा पारिएको छ । ठाउँठाउँमा सुरक्षाकर्मीको उपस्थिति बढाइएको छ । 

अरुण पूर्वलाई लिम्बुवान राज्य घोषणाको माग गर्दै राष्ट्रिय जनमुक्ति पार्टी किरात, लिम्बुवान, खम्बुवान प्रदेश परिषद्ले प्रदेश १ मा बन्दको आह्वान गरेको हो । पार्टीले अपिल जारी गरेर बजार पसल, यातायात, शैक्षिक संस्था, करकारखाना, उद्योग बन्दको घोषणा गरेको छ । 

लिम्बुवान राज्य घोषणाको माग गर्दै २०६६ सालदेखि प्रत्येक वर्ष साउन २२ गते लिम्बुवान बन्दको आह्वान गर्ने गरिएको छ । यस दिनलाई राष्ट्रिय जनमुक्ति पार्टीले लिम्बुवान गुमेको कालो दिनका रूपमा मनाउँदै बन्द र विरोधको कार्यक्रम गर्ने गरेको हो । 

विक्रम संवत २०१८ सालको लिम्बुवान र गोर्खाबीच भएको तम्रपत्र सन्धिलाई लत्याउँदै २०१८ साल साउन २२ गते लालमोहर सन्धिमार्फत लिम्बुवान राज्यलाई वृहत नेपालमा गाभिएको दाबी पार्टीको छ । यसकै विरोधमा प्रत्येक वर्ष साउन २२ गते बन्दको आह्वान गरिँदै आएको हो ।