विराटनगर । विराटनगरमा सुतिरहेको ओछ्यानमा अचेत अवस्थामा भेटिएका प्रहरी जवान २८ वर्षीय उत्तम लावतीको शनिबार बिहान मृत्यु भएको छ । प्रहरीका अनुसार लावतीलाई विराटनगर महानगरपालिका–१६ स्थित साथीको घरमा मुखबाट फिँज निस्किरहेको र अचेत अवस्थामा भेटिएको हो ।

पाँचथर घर भएका उनी शुक्रबार रामबहादुर कटुवालको घरमा आएको र राति त्यही बसेको खुलेको छ । रामबहादुरका छोरा उनका साथी हुन् । मोरङ प्रहरीका डिएसपी राजन कार्कीका अनुसार सुतेकै ओछ्यानमा बेहोस अवस्थामा भेटिएपछि प्रहरी जवान लावतीलाई उपचारका लागि कोसी अस्पताल लगिएको थियो । अस्पताल पुर्याउनसाथ चिकित्सकले बिहान ७ः३० बजेतिर मृत घोषित गरेको कार्कीले बताए । 

मृत्युको कारण नखुलेको र पोस्टमार्टमका लागि शव कोसी अस्पतालमै राखिएको प्रहरीले जनाएको छ । घटनाको अनुसन्धान सुरु गरिएको र पोस्टमार्टम रिपोर्ट प्राप्त भएपछि मृत्युको कारण प्रष्ट हुने डिएसपी कार्कीले बताए । 

सर्लाही प्रहरीमा कार्यरत रहेका लावती झापाका लागि असार ३० गते रवाना बुझेर हिँडेको पाइएको छ । झापा जाने क्रममा उनी विराटनगरस्थित साथीको घरमा आएर बसेको प्रहरीले जनाएको छ ।