इटहरी । मोरङको कटहरी गाउँपालिकाले बनाएको सडक स्थानीय एक व्यापारीले डोजर लगाएर भत्काइदिएका छन् । कटहरी–२ आदर्श टोलको रिङरोड जोडने सडक बिहीबार दिपक राठीले डोजर लगाएर भत्काइदिएका हुन् ।

सडक भत्काउने राठी कटहरीमा रहेको गोपाल फन पार्कका सञ्चालक हुन् । कटहरीको आदर्श टोलबाट कुकुरपुल अगाडिको करिब २ समय मिटर सडक राठीले डोजर लगाएर भत्काइदिएपछि आवगमन ठप्प भएको छ ।

आदर्श टोल हुँदै कटहरी गाउँपालिका २ वडा कार्यालय अगाडिको रिङरोड जोड्न सडक बनेको हो । करिब दुई वर्ष अगाडि सडकको ट्रयाक खोलिएको थियो । स्थानीय गौतम प्रधानको ६० प्रतिशत र दिपक राठीको ४० प्रतिशत जग्गाको बिचबाट सडक निकालिएको थियो ।

आर्थिक वर्ष २०७७/७८ मा गाउँपालिको ५ लाख लागतमा सडक ग्राभेल बनाएको थियो । सडकको चौडाइ २० फुटको रहेको छ । जग्गाधनी राठीले एकलौटी तरिकाले मनलाग्दी रूपमा सडक अपायक भएको भन्दै भत्काएका हुन् ।

सडक भत्काएपछि गाउँपालिकाले बिहीबार स्काइभेटर नियन्त्राणमा लिएर जिल्ला प्रहरी कार्यालय मोरङलाई बुझाएको गाउँपालिकाका अध्यक्ष देवराज चौधरीले जानकारी दिए । जनताको करबाट बनेको सडक भत्काएको पाइएपछि स्काइभेटर नियन्त्रणमा लिएर कारवाहीको प्रक्रिया अगाडि बढाएको उनले बताए ।

सडक भत्काउनेलाई सरकारी सम्पत्ती हिनामिना गरेको भन्दै प्रहरीमा उजुरी दिएर थप कारवाहीको प्रक्रिया अगाडि बढाउने गाउँपालिकाले जनाएको छ । कटहरी २ आर्दश टोलका राम चन्द सहनीले हुकुमी शैलीमा जनताको करबाट बनाएको सडक भत्काएपछि अहिले आवत जावतमा समस्या भएको बताए । सडक भत्काएपछि कटहरी २ का जनताले सास्ती पाएका छन् । सडक भत्काउनेलाई कडाभन्दा कडा कारवाही गर्न स्थानीयले माग गरेका छन् ।

जग्गाधनी राठीले आफ्नो नम्बरी जग्गाबाट आफूलाई जानकारी नदिइ सडक बनाएकोले भत्काएको बताए । पुलबाट सिधा सडक लैजान माग गर्दा बजेट सक्न आफ्नोे नम्बरी जग्गाबाट घुमाएर बाटो लगिएकोले भत्काएको उनको दावी छ ।