तेह्रथुम । तेह्रथुम ढाका कपडाले ३९ वर्षपछि राजधानीको स्वरूप पाएको छ । ३९ वर्ष अगाडि देखि तेह्रथुममा ढाका कपडा बुन्ने गरिएको थियो ।बेलायती नागरिक सुसी डान्स्मोरले सन् १९८३ मा लगातार तीन वर्ष लगाएर तेह्रथुममा उत्पादन हुने ढाकाका कपडाको अध्ययन तथा अनुसन्धान गरेकी थिइन ।

उनले ढाका कपडा बुन्दा प्रयोगमा ल्याइने धागोको रङ्गको छनोट गरिदिएपछि तेह्रथुममा ढाका कपडा बुन्नेहरू आकर्षित भएका थिए ।सोमवार तेह्रथुमलाई ढाका कपडाको राजधानी घोषणा गरिएको छ । उद्योग वाणिज्य तथा आपूर्ति मन्त्रालयले ढाका कपडाको राजधानी घोषणा गरेको हो । हाते तान बाट बुनिने भएकाले पनि तेह्रथुमे ढाका प्रतिको आकर्षण बढ्दो रूपमा रहेको व्यवसायी रामसिंह आलेले बताए ।

ढाका कपडा बुनेर नै धेरैले आफ्नो जिविको पार्जन गर्ने गरेका छन् । म्याङ्लुङ नगरपालिकाका प्रमुख संजय तुम्बाहाम्फे अनुसार म्याङ्लुङ नगरपालिका भित्र मात्रै ४५ सय भन्दा बढिले रोजगारी पाएका छन् । ढाका बुन्नेहरूमा धेरै महिलाहरू रहेका छन् ।

यहाँ उत्पादन भएका ढाकाका कपडाहरू नेपालमा मात्रै नभई विभिन्न देशमा निर्यात हुने गरेको छ ।घोषणापछि सीप विकास, प्रविधिको बढवा र बजारीकरणमा पनि अगाडि बढाइने उद्योग वाणिज्य तथा आपूर्ति मन्त्रालयका सचिव अर्जुन प्रसाद पोख्रेलले बताए  ।

यसअघि मन्त्रालयले पाल्पालाई पनि ढाका कपडाको जिल्ला घोषणा गरेको थियो । घरेलु तथा साना उद्योग कार्यालय तेह्रथुमका अनुसार जिल्लामा १ सय ४५ वटा ढाका कपडा उद्योग दर्ता भएर सञ्चालनमा रहेका छन् । १ हजार भन्दा बढी उद्योग भने विना दर्ता संचालन भएका अनुमान कार्यालयको रहेको छ । तेह्रथुममा ढाका कपडा बुनाइ सम्बन्धी तालिम लिनेको सङ्ख्या १० हजार भन्दा बढी छ ।